Belgili jýrnalıst ári tarıhshy, qoǵam belsendisi Naǵashybaı Esmyrza ómirden ozdy. Bul týraly belgili jýrnalıst Jolymbet Mákish Feısbýk paraqshasynda jarııalady.
" «Atajurt eriktileriniń» sotyna qatysý úshin tańerteń on kezinde Almaty qalalyq sotyna barǵanmyn. 15 mınýttaı erte baryppyn. Zalda otyrsam, Naǵashybaı marqum janymdaǵy adamdarmen amandasyp jatyr eken. Kórmegeli kóp bolǵan. Osydan 4-5 jyl buryn «Orbıtadaǵy» kafede ara-tura kezdesip qalatynbyz. Sodan búgin birinshi ret kórdim. Burynǵydaı emes, azdap júdegen. Aman-saýlyq surasyp, ekeýimiz oryndyqqa jaıǵasa qaldyq. Baıaǵydaı emes, araq-sharapty qoıǵanyn, qazir qymyz ben shubat iship júrgenin aıtty. Aǵamnyń onysyna rıza bolyp, áńgimemiz endi qyza bergende, basyn ustaı qaldy. «Basym áketip barady» dedi de, sálden keıin bir jaǵyna qaraı qısaıyp, sulq ete tústi. Sot jaıyna qaldy. Tastap ketetin emes. Zal ý-shý. Bireý skoryı shaqyryp, endi bir kisiler aǵamyzdy eki jaqtap jerge jatqyzyp jatyr. Jedel járdem de kóp kúttirgen joq, on mınýt ótti me, ótpedi me, zý etip kele qaldy da, birden dem salyp, jumystaryna kiristi. Sóıtip arpalysyp jatqanda sot ta bitip, «Atajurt eriktilerine» salynǵan aıyppuldy sot sol kúıi qaldyrypty. «Atajurttyń» adamdary marqumnyń úı-ishine qoldan kelgenshe qarjylaı kómektesetin boldy. Álemettik jelide de, bylaıǵy ómirde de tanymal adamǵa aınalǵan Naǵashekeń osylaısha kóz aldymda baqılyq boldy. Ómir degen osy, qashan, qaı jerde jan tapsyratynyńdy bilmeısiń. Alla Taǵala Naǵashybaı aǵamyzdyń bul jalǵandaǵy bilip istegen, bilmeı istegen bar kúnásin keshirip, marqumdy óziniń raqymyna alsyn, áýmııın!" dep jazba qaldyrypty Jolymbet.
Naǵashybaı Esmyrza Adolf Gıtler týraly jazbalarymen tanymal. Birneshe jyl buryn "Gıtler - fashıst emes" atty suhbaty "Ańyz adam" jýrnalyna shyǵyp, sońy úlken daýǵa ulasqan bolatyn.
Sondaı-aq Gıtlerdiń "Maın Kamp" kitabyn qazaqshaǵa aýdaryp shyǵarsam dep saýyn aıtyp júrgen edi.
"Adyrna" ulttyq portaly
