Almaty oblysy, Talǵar aýdany, Keńdala aýyldyq okrýgin kók tútin torlady. Aqtas aýylynyń irgesindegi "Jan-Arý" qoqys polıgonynan beımaza shaqta shyqqan ay tútin men byqsyp janǵan jalynnan turǵyndardyń mazasy qashty. Bul jaıly áleýmettik jeli belsendisi Janbota Sultanmuratqyzy habarlady, dep baıandaıdy "Adyrna" ulttyq portaly.
Áleýmettik jelide Almaty oblysy, Talǵar aýdanynda ornalasqan "Jan-Arý" qoqys polıgony" byqsyp janyp jatyr. Aýaǵa taraǵan kók tútinniń ysynan aýyl-aımaqty torlady. Bul jaıly:
- Almaty oblysy, Talǵar aýdany, Keńdala aýyldyq okrýgine qarasty Aqtas aýylynyń qasyndaǵy "Jan-Arý" qoqys polıgonynyń qazirgi jaǵdaıy osylaı. Aýmaq túgel janyp jatyr. Máseleni qolǵa alyp, sheshimin tabatyn quzyrly oryndardy belgileýlerińizdi suraımyn. Mańaıyndaǵy aýyl turǵyndarynyń densaýlyǵy, qaýipsizdigi týraly aıtpaı-aq qoıaıyq... Túndegi jaǵdaı osy jazbanyń aldynda tur, - deıdi Janbota Sultanmuratqyzy.
Avtor qoqys aımaǵyndaǵy órttiń buǵan deıin de bolǵany jaıly jazyp, aýyl turǵyndarynyń densaýlyǵyna alańdaýshylyq bildirdi:
- Buǵan deıin de bul jerde órt bolyp, okrýg ákimi Almas Nurdáýletuly óz kúshterimen sóndirgenin aıtqan. Turǵyndar tarapynan túsken shaǵymdar men densaýlyqtaryna alańdaǵan jurttyń janaıqaıynan qulaq tunady. Endi, mine, sol máseleni estir qulaqqa taǵy da jetkizýge májbúrmiz. Óıtkeni el aman, jurt tynyshta ý jutyp otyrǵan halyqtyń hali múshkil. Qoqys polıgony taǵy da órtke orandy. Bul joly erteńine alańdaýly eldiń shaǵymy men janaıqaıyna kim jaýap beredi? Quzyrly oryndardan jaýap bolyp, shaǵymdary qaralýy úshin halyq ne isteýi kerek?... Suraq kóp, jaýap joq. Halyqqa qatysty másele "Baıaǵy jartas - sol jartas" kúıinde qalmasa eken deımiz!
Jeli qoldanýshylary polıgon ıesiniń Baqtyǵalı Aıjigitov esimdi azamat ekenin jazyp jatyr. Ol kisini turǵyndar órt alańyna shaqyrtqanymen, kelmegen. Ákimdik qyzmetkerleri de bolyp jatqan órt jaıly túsinikteme berýden basyn alyp qashqan. Vıdeo avtorynyń aıtýynsha, polıgondaǵy órti sýmen sóndirý de, topyraq tógip, tunshyqtyrý da múmkin emes. Sebebi, ishinen keýlep, byqsyp janyp jatqan qoqys pen qyzǵan shoqtyń ortasyna batyp ketý qaýipi bar.
- Talǵar aýdanyndaǵy Aqtas aýylynyń qasyndaǵy «Jan-Arý» qoqys polıgonynda bolǵan órt kezinde túnde 1 ǵana órt sóndirýshi mashına men 3 órtsóndirýshi jumys istegen. Sol mezette oqıǵa ornynda aýdandyq máslıhattyń depýtattary Erjan Igibaev pen Aleksandra Daýrbaeva jáne aýdan ákimi Tańat Eskeldiuly men ákim orynbasary Orazhan Qaspaqbaev ta boldy. Ákimdik qyzmetkerleri aýdandyq baspasóz hatshysy bar ekenin aıtyp, oqıǵa boıynsha túsinikteme berýden bas tartty. Al polıgon ıesi sanalatyn Baqtyǵalı Aıjigitovti shaqyrttyq degenmen, ol jerge kelgen joq, - deıdi Janbota Sultanmuratqyzy.
Depýtat E. Igibaevtiń aıtýynsha, 2020 jyly bolǵan alapat órtti de mamandar, shamamen «HOWO» kamazymen 140 mashına topyraq tógip, órtti áýpirimdep júrip áreń toqtatqan. Al qazirgi jaǵdaıynda órt astynan keýlep janyp jatqandyqtan naqty aýmaqty anyqtaý múmkin emes. Qoqystyń ústine shyǵyp óshiretin múmkindik joq. Sebebi árbir 3-4 metr saıyn býdaqtap jatqan ýly tútinniń arty kez kelgen ýaqytta alaýlaǵan órtke aınalýy múmkin. Qoqystyń ústine shyǵý da qaýipti. Óıtkeni aıaqastynan oıylyp ishine túsip ketý qaýpi bar. Sondyqtan múmkindiginshe alystan turyp sý shashqannan basqa amal bolmaı tur.
Ázirge qoqystan qýat alyp, aýaǵa taraǵan kók tútin men polıgonaǵy órt jaıly quzyrly mekemeler resmı málimdeme jasamady.
"Adyrna" ulttyq portaly
