Qoqystan küş alǧan ört. Almaty oblysynda alyp poligon örtenıp, auyl-aimaqty kök tütın torlady

Almaty oblysy, Talǧar audany, Keŋdala auyldyq okrugın kök tütın torlady. Aqtas auylynyŋ ırgesındegı "Jan-Aru" qoqys poligonynan beimaza şaqta şyqqan aşy tütın men byqsyp janǧan jalynnan tūrǧyndardyŋ mazasy qaşty. Būl jaily äleumettık jelı belsendısı Janbota Sūltanmūratqyzy habarlady, dep baiandaidy "Adyrna" ūlttyq portaly.   Äleumettık jelıde Almaty oblysy, Talǧar audanynda ornalasqan "Jan-Aru" qoqys poligony" byqsyp janyp jatyr. Auaǧa taraǧan kök tütınnıŋ ysynan auyl-aimaqty torlady. Būl jaily:

- Almaty oblysy, Talǧar audany, Keŋdala auyldyq okrugıne qarasty Aqtas auylynyŋ qasyndaǧy "Jan-Aru" qoqys poligonynyŋ qazırgı jaǧdaiy osylai. Aumaq tügel janyp jatyr. Mäselenı qolǧa alyp, şeşımın tabatyn qūzyrly oryndardy belgıleulerıŋızdı sūraimyn. Maŋaiyndaǧy auyl tūrǧyndarynyŋ densaulyǧy, qauıpsızdıgı turaly aitpai-aq qoiaiyq... Tündegı jaǧdai osy jazbanyŋ aldynda tūr, - deidı Janbota Sūltanmūratqyzy.

Avtor qoqys aimaǧyndaǧy örttıŋ būǧan deiın de bolǧany jaily jazyp, auyl tūrǧyndarynyŋ densaulyǧyna alaŋdauşylyq bıldırdı:

- Būǧan deiın de būl jerde ört bolyp, okrug äkımı Almas Nūrdäuletūly öz küşterımen söndırgenın aitqan. Tūrǧyndar tarapynan tüsken şaǧymdar men densaulyqtaryna alaŋdaǧan jūrttyŋ janaiqaiynan qūlaq tūnady. Endı, mıne, sol mäselenı estır qūlaqqa taǧy da jetkızuge mäjbürmız. Öitkenı el aman, jūrt tynyşta u jūtyp otyrǧan halyqtyŋ halı müşkıl. Qoqys poligony taǧy da örtke orandy. Būl joly erteŋıne alaŋdauly eldıŋ şaǧymy men janaiqaiyna kım jauap beredı? Qūzyrly oryndardan jauap bolyp, şaǧymdary qaraluy üşın halyq ne ısteuı kerek?... Sūraq köp, jauap joq. Halyqqa qatysty mäsele "Baiaǧy jartas - sol jartas" küiınde qalmasa eken deimız!

Jelı qoldanuşylary poligon iesınıŋ Baqtyǧali Aijıgıtov esımdı azamat ekenın jazyp jatyr. Ol kısını tūrǧyndar ört alaŋyna şaqyrtqanymen, kelmegen. Äkımdık qyzmetkerlerı de bolyp jatqan ört jaily tüsınıkteme beruden basyn alyp qaşqan. Video avtorynyŋ aituynşa, poligondaǧy örtı sumen söndıru de, topyraq tögıp, tūnşyqtyru da mümkın emes. Sebebı, ışınen keulep, byqsyp janyp jatqan qoqys pen qyzǧan şoqtyŋ ortasyna batyp ketu qauıpı bar.

- Talǧar audanyndaǧy Aqtas auylynyŋ qasyndaǧy «Jan-Aru» qoqys poligonynda bolǧan ört kezınde tünde 1 ǧana ört söndıruşı maşina men 3 örtsöndıruşı jūmys ıstegen. Sol mezette oqiǧa ornynda audandyq mäslihattyŋ deputattary Erjan İgıbaev pen Aleksandra Daurbaeva jäne audan äkımı Taŋat Eskeldıūly men äkım orynbasary Orazhan Qaspaqbaev ta boldy. Äkımdık qyzmetkerlerı audandyq baspasöz hatşysy bar ekenın aityp, oqiǧa boiynşa tüsınıkteme beruden bas tartty. Al poligon iesı sanalatyn Baqtyǧali Aijıgıtovtı şaqyrttyq degenmen, ol jerge kelgen joq, - deidı Janbota Sūltanmūratqyzy.

Deputat E. İgıbaevtıŋ aituynşa, 2020 jyly bolǧan alapat örttı de mamandar, şamamen «HOWO» kamazymen 140 maşina topyraq tögıp, örttı äupırımdep jürıp äreŋ toqtatqan. Al qazırgı jaǧdaiynda ört astynan keulep janyp jatqandyqtan naqty aumaqty anyqtau mümkın emes. Qoqystyŋ üstıne şyǧyp öşıretın mümkındık joq. Sebebı ärbır 3-4 metr saiyn budaqtap jatqan uly tütınnıŋ arty kez kelgen uaqytta alaulaǧan örtke ainaluy mümkın. Qoqystyŋ üstıne şyǧu da qauıptı. Öitkenı aiaqastynan oiylyp ışıne tüsıp ketu qaupı bar. Sondyqtan mümkındıgınşe alystan tūryp su şaşqannan basqa amal bolmai tūr. Äzırge qoqystan quat alyp, auaǧa taraǧan kök tütın men poligonaǧy ört jaily qūzyrly mekemeler resmi mälımdeme jasamady.

"Adyrna" ūlttyq portaly