«AMANAT» partııasy men Halyk Bank qolǵa alǵan «Qaryzsyz qoǵam» qarjylyq saýattylyqty arttyrý jobasyna 1,5 myńǵa jýyq otandasymyz qatysyp jatyr. Keshe alǵashqy dáris ótti.
Partııa Hatshysy Eldar Jumaǵazıev jobaǵa qatysýshylar qarjylyq máseleler qalaı paıda bolatynyn, dál qazirgi ýaqyttaǵy qaryzdar sanyn azaıtýdyń qandaı joldary bar ekenin, alaıaqtardyń negizgi algorıtmderin, nesıelik tártip máselelerin jáne t.b. zertteıtinin atap ótti.
«Osyndaı jobanyń qajet ekeni burynnan baıqalyp keledi. Qaryzǵa belsheden batqan kóp adam odan óz betinshe qutyla almaıdy. Tipti, qaıda baryp, kimnen kómek suraıtynyn da bilmeıdi. Bul ásirese aýyldyq eldi mekenderdiń turǵyndary úshin óte ózekti másele. Sondyqtan birinshi kezekte kýrstar oblys ortalyqtarynda emes, aýdandarda ótedi», - dedi ol.
Jobaǵa qatysýshylar kúndizgi formatta saýatyn arttyryp, bir topta 50 adamǵa deıin oqytylady. Oqý proesiniń uzaqtyǵy – 5 jumys kúni.
Qarjy mamandarynyń dárisinen bólek, oqý proesine qatysýshylarǵa zańger kómegi kórsetiledi. Olar ár qaryz alýshynyń nesıe tarıhyn jeke-jeke zerttep, qaryz júktemesin jeńildetý boıynsha tájirıbelik keńes beredi.
Eske sala keteıik, buǵan deıin «AMANAT» partııasy Halyk Bank-pen birge «Qaryzsyz qoǵam» jobasynyń bastalǵanyn jarııalap, tıisti memorandýmǵa qol qoıǵan bolatyn. Jobany Halyk Bank qarjylandyrady.
Jobanyń basty maqsaty – azamattardyń ásirese, bereshegi bar qaryz alýshylardyń (jeke tulǵalar) qarjylyq saýatyn arttyrý. Oqytý jumysy jyl sońyna deıin jalǵasady.
«Qaryzsyz qoǵam» jobasy aıasynda alǵashqy kezeńde Aqtóbe, Almaty, Túrkistan, Soltústik Qazaqstan, Batys Qazaqstan, Jambyl, Atyraý jáne Mańǵystaý oblystarynyń 80 myńǵa jýyq turǵyny oqytylady.
