«Jaily mektep» Ūlttyq jobasyn ıske asyruǧa otandyq öndıruşılerdı tartu mäselesı bügın Mäjılıstegı «AMANAT» deputattyq fraksiiasynyŋ keŋeitılgen jiynynda talqylandy.
Memleket basşysy Qasym-Jomart Toqaev byltyr 1 qyrküiektegı Qazaqstan halqyna Joldauynda «Jaily mektep» Ūlttyq jobasynyŋ qolǧa alynatynyn jariia ettı. Jobany ıske asyru barysy turaly «AMANAT» partiiasynyŋ deputattyq fraksiiasy aldynda Oqu-aǧartu vise-ministrı Edıl Ospan baiandama jasady. Ol soŋǧy 10 jylda elımızde oquşylar sany 1 mln-ǧa artyp, 3,7 mln-ǧa jetkenın mälımdedı. Qazırgı uaqytta 270 myŋ oquşy orny tapşy. Eger tiıstı şara qabyldanbasa, 2026 jylǧa qarai būl körsetkış 1 mln-nan asady.
«Sondyqtan Ūlttyq joba aiasynda 2026 jylǧa deiın 800 myŋǧa juyq oquşy orynyn paidalanuǧa beru josparlanyp otyr. Būl mektepter oquşylar men pedagogtarǧa jaily jaǧdai jasau üşın qajettı zamanaui qūral-jabdyqtarmen, jihazdarmen, internet jelısımen qamtamasyz etıledı. Ärbır oquşy üşın jeke şkaf, transformer parta ornatylyp, mekteptıŋ är qabatynda oquǧa jäne demaluǧa arnalǧan kovorking bölme, interaktivtı qūrylǧy, TOUCH/LED-ekran, ämbebap şeberhana jäne t.b. bolady», - dedı Edıl Ospan.Sondai-aq vise-ministr 2026 jylǧa deiın Ūlttyq jobadan tys şamamen 600 myŋ oquşy ornyn paidalanuǧa beru, auyldarda, şaǧyn qalalarda jäne audan ortalyqtarynda 3 myŋnan astam mekteptı jaŋǧyrtu josparlanǧanyn atap öttı. Jaratylystanu-matematika baǧytynda bılım berudı jaqsartu maqsatynda 2029 jylǧa deiın mektepterde jergılıktı biudjet esebınen 7 myŋ zamanaui robototehnika, himiia, fizika, biologiia, STEM kabinetterın aşu közdelgen. Fraksiia basşysy, partiianyŋ Atqaruşy hatşysy Elnūr Beisenbaev mektepter salu kezınde Qazaqstanda öndırılgen materialdar paidalanyluy tiıs ekenın atap öttı.
«Elımızde kez kelgen auqymdy infraqūrylymdyq qūrylys kezınde barynşa otandyq öndırıs materialdary paidalanyluy tiıs. «Jaily mektep» jobasyn jüzege asyruǧa 2,6 trln. teŋge bölındı. Būl qarajat oquşy oryndarynyŋ jetıspeuşılıgın şeşıp qana qoimai, otandyq öndırıstı damytuǧa baǧyttaluy tiıs. Konkurstyq qūjattamany räsımdeu kezeŋınen-aq otandyq käsıpkerdı qoldau şaralary belgılenuı tiıs edı. Alaida, jobalau kezeŋınıŋ özınde importtyq materialdardy paidalanu közdelıp, otandyq tauarlar ysyrylyp qalyp jatyr. Osyǧan bailanysty tapsyrys alyp, jūmysy jüretınıne senıp qalǧan salalyq qauymdastyqtardan türlı şaǧym kelıp tüsude. Sondai-aq, materialdar, jihazdar men jabdyqtar boiynşa barlyq satyp alu räsımı qūrylys kompaniialarynyŋ qūzyretıne berılgen. Al ırı biznes öz paidasyn ǧana oilap otyr. Qūrylys materialdaryn, şyny, jihaz, tehnika öndıretın bızdıŋ käsıporyndar jobaǧa qatysuy tiıs. Özge eldıŋ ekonomikasyn jarylqai berudı doǧaru kerek», - dedı ol.Öz kezegınde «Samruk-Kazyna Construction» AQ Basqarma töraǧasy Mäulen Aimanbetov kompaniia bıryŋǧai standart boiynşa ǧimarattardyŋ tiptık jobasyn äzırlep jatqanyn aitty. Būlar – 300, 600, 900, 1200, 1500, 2000 jäne 2500 oquşy ornyna arnalǧan ekı auysymdy mektepter.
«Bız 5 klimattyq aimaqqa arnalǧan 7 jobalyq quat boiynşa 35 jobalyq-smetalyq qūjattama äzırlep jatyrmyz. 2026 jylǧa deiın barlyǧy 401 mektep salynady. Jalpy qyzmetterdı paidalanu auqymy boiynşa qazaqstandyq önımnıŋ ülesı şamamen 70-80%-dy qūrauy tiıs. Mäselen, jihaz jasaityn otandyq kompaniialardyŋ 90%-y tiıstı tehnikalyq sipattama alǧan jaǧdaida mektep jihazdaryn şyǧara alady. Bız qūrylys kompaniialaryna uaqtyly kelısımşarttar jasasu jäne jihazǧa tapsyrys beru boiynşa talaptar qoiamyz. Qyzmettı jetkızuşılerden: 3 jyldan 5 jylǧa deiın qyzmet körsetu turaly kepıldık jäne CT KZ sertifikatynyŋ boluy talap etıledı», - dep atap öttı ol.Deputat Jūldyz Süleimenova mektepterdı oquşy sany boiynşa bölu mäselesıne nazar audardy. Mäselen, 2500 oquşyǧa negızdelgen tek 3 ǧimarat tūrǧyzylady. Onyŋ bıreuı Aqmola oblysynda, al qalǧan ekeuı Almaty qalasynda salynady.
«Mūndai mektepterdıŋ jalpy qauıpsızdıgıne qataŋ talap qoiyluy kerek. Iаǧni, jer sılkınısıne tözımdılık pen şūǧyl evakuasiia jasau mümkındıgı mäselelerıne airyqşa män berıluı tiıs. Mūndai ǧimarattardyŋ aumaǧy da keŋ boluy kerek. Sonymen qatar, tenderlerdı bırneşe ret ötkızbeu üşın qūrylystyŋ keşıguıne jol beruge bolmaidy», – dedı ol.Fraksiianyŋ müşesı Janarbek Äşımjanov mektep qūrylysynyŋ barysyna jäne biudjet qarajatynyŋ igerıluıne qoǧamdyq baqylau jürgızu taqyrybyn qozǧady.
«Būǧan deiın qūrylys barysyn baqylaityn aqparattyq-sifrlyq platforma jūmys ısteitını aityldy. Būl elektrondyq jüie aşyq qoǧamdyq baqylau jürgızuge arnalǧan. Sondai-aq, bızge mektepter sany qysqarǧany turaly beiresmi mälımet jetıp otyr. Eger būl derek şyndyqqa säikes kelse, onda qarjylandyru kölemı de qysqaruy kerek. Taraptar biudjet qarajatyn igeru kezınde ünemşıldık tanytuy tiıs», – dedı ol.Fraksiia jinalysynyŋ qorytyndysy boiynşa Elnūr Beisenbaev deputattardyŋ jūmysyn küşeitu boiynşa bırqatar tapsyrma berdı. Ol «Jaily mektep» jobasyn tūraqty baqylauda ūstau maŋyzdy ekenın atap öttı.
«Memleket basşysynyŋ jaily mektepter salu jönındegı igı bastamasyn jüielı jüzege asyruymyz kerek. Būl ıske qoǧam bolyp jūmylu qajet. Ärbır qazaqstandyq bala zamanaui mektepte bılım aluǧa tolyq qūqyly. Otandyq tauar öndıruşılerge aitarym, basty maqsat – tabys tabu emes, jaily mektep tūrǧyzu. Jas ūrpaq sızder öndırgen jihazdardy paidalanyp, 11 jyl bılım alady. Baqai esep üşın emes, zamanaui mektep salu üşın jūmys ısteumız kerek. AMANAT» fraksiiasy ärdaiym osyndai maŋyzdy mäselelerdıŋ köşbasynda jüruge daiyn. Bız būl mäselenı baqylauda ūstaimyz», - dep tüiındedı Elnūr Beisenbaev.
