Bul týraly elimizdiń áleýmettik-ekonomıkalyq damýy jónindegi keńeste Memleket Basshysy Qasym-Jomart Toqaev aıtty, dep habarlaıdy "Adyrna" ulttyq portaly.
«Jańaózende bolǵan jarylystyń saldaryn joıý jumystaryn tez arada bitirý qajet. Jalpy, Jańaózen – munaı-gaz salasyna ǵana qarap otyrǵan monoqala. Sol sebepti, biz ony damytý úshin arnaıy keshendi jospar qabyldadyq. Osy qujatty meılinshe júzege asyrý kerek. Úkimet te bul jumysqa jaýapty bolady. Batysta, ásirese, Mańǵystaýda, jastar kóbine munaıshy bolǵysy keledi. Bul – durys emes. Munaı qory taýsylǵanda aımaqtaǵy ahýal tipti kúrdeli bolyp ketýi múmkin. Sondyqtan jastardyń basqa da kásipterdi ıgerýine jaǵdaı jasaýymyz kerek. Bul jumysty arnaıy jospar boıynsha atqarý qajet», – dedi Prezıdent.
