Ūlttyq qauıpsızdık komitetı qazaqstandyqtardyŋ Ukraina jerındegı soǧysqa aralasuyna qatysty 10 qylmystyq ıstı tergep-tekserudı bastady. Būl jaily KazTAG aqparat agenttıgı ŪQK-nıŋ baspasöz qyzmetıne sılteme jasap habarlady, dep jazdy "Adyrna" ūlttyq portaly.
Ūlttyq qauıpsızdık komitetı tergeu ısıne qatysty naqty derekterdı aşyp aitpady. Qazaqstandyqtardyŋ qai tarapta bolysyp, qai şepte ūrysqa qatysqany jaily äzırge habarlanǧan joq.
Qazaqstan Respublikasynyŋ zaŋnamasynda, naqtyraq aitsaq, qylmystyq kodekstıŋ 172-babynda, şeteldık qaqtyǧystarǧa aralasqan el azamattaryn bes jyldan toǧyz jylǧa deiın bas bostandyǧynan şekteu qarastyrylǧan.
2022 jyly, qyrküiek aiynyŋ soŋynda Vladimir Putin arnaiy zaŋǧa qol qoidy. Zaŋ boiynşa Resei qaruly küşterınıŋ qatarynda jäne "özge äskerlerde" qyzmet etu üşın kelısımşart jasasqan şeteldıkter Reseide tūru mümkındıgıne ie bolyp, azamattyǧyn jeŋıl talaptarmen ala alady.
"Azattyq radiosy" Ukraina topyraǧynda Reseige bolysyp ūrysqa aralasqan qazaqstandyqtar jaily jazǧan edı. Olar Vagner ChVK qatarynda basqynşylyq soǧystaryna qatysqan. Būqaralyq aqparat qūraldarynda qazaqstandyqtardyŋ öz erıkterımen soǧysqa sūranyp barǧany da aitylady.
"Adyrna" ūlttyq portaly
Ūqsas jaŋalyqtar
