Ierýsalım qalasyndaǵy Ál-Aqsa meshitinde Izraıl qaýipsizdik kúshterimen qaqtyǵys kezinde ondaǵan palestınalyq jaraqat aldy, dep habarlaıdy "Adyrna" ulttyq portaly.
WAFA agenttiginiń habarlaýynsha, Izraıl qarýly kúshteri seısenbi kúni keshke meshittiń namazhanasyna basyp kirip, ondaǵy palestınalyqtarǵa granatalar laqtyryp, ýly gaz seýip, rezeńke oqpen atyp, shabýyl jasaǵan.
Agenttiktiń málimetine qaraǵanda, meshitke basa-kóktep kirgen Izraıl qaýipsizdik kúshteri myltyq qarýyn da qoldanǵan.
Palestınanyń tutqyndar isteri jónindegi komıtetiniń baspasóz hatshysy Rııad ál-Ashkar jýrnalısterge Izraıldiń Ál-Aqsadaǵy reıd nátıjesinde 200-den asa jergilikti turǵynnyń ustalǵanyn habarlady.
Onyń aıtýynsha, ustalǵandar Izraıldiń Ierýsalımdegi Anata áskerı bazasyna jetkizilgen.
- Ál-Aqsa meshitinde jaralanǵan biraz adam shuǵyl emdelýdi qajet etedi. Degenmen Izraıl olarǵa medıınalyq kómek kórsetýden nemese aýrýhanalarǵa jiberýden bas tartyp jatyr, - dedi ol.
Palestına aqparat quraldary reıdten keıin Iordan ózeniniń batys jaǵalaýyndaǵy birqatar qalalarda sherýler bastalǵanyn habarlady. Iordanııanyń Syrtqy ister mınıstrligi de Izraıldiń áreketine jaýap berip, reıdti qatań aıyptady.
Basqa da málimetke qaraǵanda, osyǵan jaýap retinde Gaza sektory Izraıldi zymyranmen atqylaǵan. Izraıl jaýap retinde ushaqtarmen soqqy jasady.
Taıaý Shyǵystaǵy janjal taǵy ýshyǵyp barady.
