Májiliske ótken 6 partııa depýtattarynyń tizimin jarııalady. Qazaqstan qoǵamdyq damý ınstıtýtynyń sarapshysy Jaqsybek Jıenalıev saılanatyn depýtattar endi elimizdi jańa bir deńgeıge kóteredi degen pikirimen bólisti.
Saılaý naýqany bastalǵaly beri birqatar partııanyń úgit-nasıhat jumystaryn belsendi atqarǵanyn kórdik. Solardyń biri «Amanat» partııasy búgin kandıdattarynyń tizimin usyndy. Quramynyń 50 paıyzy burynǵy depýtattardan turady. Al qalǵan 50 paıyzy qazaq tili máselesin kóterip júrgen Maksım Rojın, áleýmettik máselelerge toqtalatyn Maqsat Tolyqbaı, Nartaı Aralbaıuly jáne saıasatker Samat Nurtaza syndy elge tanymal azamattardan quralǵan. Al jańadan qurylǵan «Respublica» partııasy da erekshe kózge túsip, 6 mandatyn bılikke ótkizdi. Onyń quramynda burynnan kele jatqan elge tanymal kásipkerler, tulǵalar bar. Óz basym partııalardyń atynan saılanatyn depýtattar ózekti máselelerdi sheship, elimizdi jańa bir deńgeıge kóteredi dep oılaımyn, - dedi Jaqsybek Aqtileýuly.
Sondaı-aq sarapshy bıylǵy saılaýdyń bir ereksheligine toqtaldy.
Osy jolǵy ótken saılaýdyń jaqsy jańalyqtarynyń biri - «Aýyl» partııasynyń bılikke ótýi. Halyqtyń bul partııaǵa daýys berip, senim bildirgeni bizdi qýantady. Sebebi aýyl máselesi qazirgi tańda ózekti bolyp otyr. Ony sheshý úshin bılikke aýylǵa jaqyn, janashyr mamandar kelýi tıis, - dedi ol.
Sonymen qatar Jaqsybek Jıenalıev múmkindigi shekteýli jandardyń máselesi qashanda mańyzdy ekenin atap ótti.
Ár partııa saılaý kezinde 30 paıyzdyq kvota boıynsha óz kandıdattaryn usyndy. Endi depýtattyq qyzmetke taǵaıyndalatyndary múmkindigi shekteýli azamattardyń máselesin sheshetin bolady. Mysaly olarǵa arnalǵan qarapaıym qaladaǵy pandýstardyń, arnaıy qoǵamdyq demalys oryndarynyń joqtyǵy bilinedi. Sóıtip keıde sol jandardyń quqyqtary shektelip jatady. Sondyqtan múmkindigi shekteýli jandardyń máselesi nazardan tys qalmaı, Májiliste talqylanýy qajet dep esepteımin, - deıdi ol.
Qazaqstan qoǵamdyq damý ınstıtýtynyń sarapshysy Májiliske 6 partııa ótedi dep kútpegen.
Negizi depýtattar saılaýyna qatysty boljamym basqasha bolǵan. Bılikke 4 partııa ótedi dep oıladym. Maǵan basqa da sarapshylardyń boljamy ózgeshe bolǵan sııaqty kórinedi. Sebebi 7 partııanyń 6-ýy Parlamentke ótip ketti. Buǵan ótken jyly salǵan saıası reformalar men referendýmdaǵy partııalardyń 5 paıyzdyq mejeden asyp ótýi sebep bolyp otyr, - deıdi Jaqsybek Aqtileýuly.
