Múftııat jýrnalıstiń jalǵan sózine qatysty málimdeme jasady, dep habarlaıdy «Adyrna» BAQ.KZ-ke silteme jasap.
Áleýmettik jelidegi Janat Baqyt degen jýrnalıstiń Alla taǵala týraly aıtqan aýyr sózderi musylmandar arasynda túsinispeýshilik týdyrdy. Osy oraıda Qazaqstan musylmandary dinı basqarmasyna ár óńirden túrli pikir, narazylyq bildirgen hattar kelip jatyr, -dedi QMBD tóraǵasynyń orynbasary, naıb múftı Ershat Ońǵar.
Naıb múftı sharıǵatta Allanyń atynan jalǵan sóıleý, óte aýyr kúná ekenin aıtty.
Alla taǵala qasıetti Qurannyń Án'am súresiniń 144-aıatynda «Adamdardy nadandyqpen adastyrý úshin Allanyń atynan jalǵandy jalpaǵynan basatyn pendeden ótken zalym bar ma?» dep baıandaǵan. Alla saqtasyn, Qudaı atynan jalǵan sóıleýden aýyr is joq. Ásirese, Ramazan aıynda osyndaı keleńsiz sózdi aıtý men úshin de aýyr, - dedi ol.
Ershat Ońǵar halyq tarapynan suraq jıi qoıylyp, narazylyq bildirip jatqannan keıin múftııat atynan resmı málimdeme jasaýǵa májbúr bolyp otyrǵanyn aıtty.
Hákim Abaı «Alla taǵala - ólsheýsiz, bizdiń aqylymyz - ólsheýli. Ólsheýlimen ólsheýsizdi bilýge bolmaıdy» dep aıtqan. Osy rette barsha musylman qaýymyn, barsha otandasymyzdy jýrnalıst Janat Baqyttyń sózine erip, dástúrli senimimizge selkek túsirip, el ishinde arandatýshylyq týdyrýdan saq bolýǵa shaqyramyz. Qasıetti Ramazan aıynda mundaı aýyr sóz aıtyp, el ishinde narazylyq týdyryp alýdan saq bolaıyq. Tutqan oraza qabyl bolsyn. Elimiz aman, jurtymyz tynysh bolsyn. Alla taǵala táýelsizdigimizdi baıandy etsin, - dedi Ershat Ońǵar.
