Sáýle Ábedınova: Qaıtys bolǵan adam qalaı keledi?

2641
Adyrna.kz Telegram

Telejúrgizýshi Sáýle Ábedınova zeınetaqy qorynda keleńsiz jaıtqa tap bolǵanyn aıtty. Jýrnalıst zeınetaqy qorynan qaza bolǵan ulynyń jerleýine beriletin somanyń qansha ekenin bilmek bolǵan, – dep habarlaıdy stan.kz.

Sáýle Ábedınova BJZQ-na arnaıy baryp, qaıtys bolǵan ulynyń jerleýine beriletin soma jaıly surady. Alaıda qyzmetker soma jaıly aqparat berýden bas tartqan. Ol úshin marqumnyń anasy ekenin notarıýs arqyly rastaıtyn qaǵaz kerek ekenin alǵa tartqan.

«Meniń qolymda ulymnyń ólimi týraly, ózimniń týý týraly kýáligim tur. Onyń anasy ekenim belgili bolsa, ne  úshin notarıýs arqyly rastap, ýaqyt joǵaltýym kerek? Ár jerge baryp anasy ekenimdi rastap júrgende aqsha jumsalady. Al, ulymnyń jerleýine qordan beriletin soma onyń óteýine tatı ma? Maǵan sony ǵana bilý kerek bolyp tur», – deıdi Ábedınova.

Al, BJZQ ákimshisi kelip, olardyń zań boıynsha soma jaıly aıta almaıtynyn jetkizdi.

Telejúrgizýshi munyń qısynsyz ekenin, azamattardyń notarıýsqa sabylmaı-aq qolyndaǵy qujatymen jaqyny ekenin dáleldeýge bolatynyn aıtty.

«Qyzmetker ol somany bilýge qaıtys bolǵan adamnyń ózi kelý kerek dedi. Qaıtys bolǵan adam qalaı keledi?», – deıdi  telejúrgizýshi.

Buǵan deıin telejúrgizýshiniń jalǵyz ulynan aıyrylǵanyn jazǵan edik. Al, jaqynda qaıtys bolǵan adamnyń jerleýine marqumnyń zeınetaqy qorynan aqsha beriletini aıtyldy.

Pikirler