Bul týraly Bolat Jámishevtiń tóraǵalyǵymen ótken «Samuryq-Qazyna» UÁQ Qoǵamdyq keńesiniń otyrysynda qordyń basqarýshy dırektory Ǵıbrat Aýǵanov habarlady.
Qoǵamdyq keńestiń kezekti ashyq otyrysy «Samuryq-Qazyna» qoryna qaraıtyn kompanııalardaǵy eńbekti qorǵaý máselesine arnaldy. Oǵan keńes múshelerimen qatar, qazaqstandyq qoǵam belsendileri, saıasatkerler men sarapshylar qatysty.
«Samuryq-Qazyna» qorynyń qoǵammen baılanys, áleýmettik-eńbek qatynastary jáne eńbekti qorǵaý boıynsha basqarýshy dırektory Ǵıbrat Aýǵanovtyń aıtýynsha, 2022 jyly qolǵa alynǵan sharalardyń nátıjesinde kompanııalar tobyndaǵy jalpy jaraqattaný deńgeıi 2021 jylmen salystyrǵanda 16% qysqarǵan. LTIF jaraqattaný koeffııenti, ıaǵnı jumysshynyń ýaqytsha eńbekke jaramsyzdyǵyna ákelgen jaraqattardyń jıiligi 0,16-ny qurasa, ólim jaǵdaılarynyń koeffııenti 11%-ǵa tómendedi.
Ǵıbrat Aýǵanov bul rette portfeldik kompanııalar men táýeldi, enshiles uıymdardyń birinshi basshylarynyń jeke jaýapkershiligin arttyrý qolǵa alynǵanyn atap ótti.
«Onyń aıasynda Qazaqtelekom, KEGOC, QazaqGaz jáne Samruk-Kazyna Ondeu kompanııalarynda Qor tájirıbesine súıene otyryp alǵash ret óndiristik qaýipsizdik boıynsha mamandandyrylǵan forýmdar ótkizildi. Onda táýeldi enshiles uıymdar men qurylymdyq bólimshelerdiń basshylary óndiristik qaýipsizdik boıynsha óz moınyna jeke mindettemelerdi aldy. Budan bólek, portfeldik kompanııalardyń birinshi basshylary keminde 2 aıda 1 ret enshiles, táýeldi uıymdardyń óndiristik alańdaryna baryp, tekserý júrgizý tártibi belgilendi. Bul jumys qazirgi tańda da júrgizilip jatyr. 2022 jyly mundaı 43 tekserý boldy», – dedi Ǵıbrat Aýǵanov.
Sondaı-aq, ol Ulybrıtanııanyń Qaýipsizdik tehnıkasy jáne densaýlyq saqtaý ınstıtýty maquldaǵan «Eńbek qaýipsizdiginiń mádenıeti» atty korporatıvtik oqý kýrsyn ázirlengenine nazar aýdardy. Bul kýrs boıynsha óndiristik qyzmetkerlerdi 100% oqytýdy josparlanǵan.
