Jahandaný zamanynda qazaqtyń otbasylyq qundylyqtaryn saqtaýy óte mańyzdy. Alaıda sońǵy jyldary otbasy qundylyǵyna júrdim-bardym qaraıtyn boldyq. Al bul máseleni sheshýdiń joly bar ma?
Respýblıkalyq «Qara shańyraq» qoǵamdyq birlestiginiń tóraıymy Turar Sáttarqyzynyń aıtýynsha, búgingi tańda shyǵyp jatqan problemanyń bári otbasyndaǵy tárıbeden shyǵyp jatyr. Al osy bir otbasy qundylyǵynyń álsiregeninen keıin qarttar qaraýsyz qalyp jatqan kórinedi.
«Mysaly elimizde jyldan jylǵa qarttar úıi kóbeıip kele jatyr. Memleketik qarttar úıinen bólek, jeke menshik qyzmet kórsetetin uıymdar da paıda bola bastady. Munyń bári aınalyp kelgende ulttyq qundylyqarymyzdyń keri ketip bara jatqanynan dep bilemin. Negizi memleket tarapynan jas urpaqtyń tárbıesine nazar aýdaratyn kez kelip jetti. Al biz mysqyldap kirgen aýrý jazylyp ketetin sekildi kórip otyrmyz. Alaıda ulttyq tárbıege mán bermesek, otbasy qundylyǵyn túsinetin jastardyń sany azaıa beredi. Elimizde otbasy qundylyǵyn qalyptastyrýmen aınalysatyn ár túrli uıymdar men keńester jumys isteıdi. Ókinishke qaraı olardyń jumysy kózge kórinip jatqan joq. Túrli is-sharalar ótedi. Biraq onda Zeınep Ahmetova, Orazkúl Asanǵazy, Sáýle Meshitbaıqyzy sekildi analarymyzdy shaqyryp, olardyń ǵıbratty áńgimelerin tyńdaýǵa bolady ǵoı», – deıdi birlestik jetekshisi.
Turar Sáttarqyzy otbasy qundylyǵyna otbasy, oshaq qasyndaǵy másele dep qaraýǵa bolmaıtynyn aıtady. Naqtyraq aıtsaq ol otbasy qundylyǵyna memlekettik deńgeıde mán beretin kez keldi degen pikirde.
«Jýyrda Memleket basshysy Qasym-Jomart Toqaev aqsaqaldar alqasyn qurý kerek dep bastama kóterdi. Bul shyn máninde óte keremet bastama. Óıtkeni qazirgi zamanda aqsaqaldarymyzdyń qadiri ketip qaldy. Ashyǵyn aıtsaq qazynamyz sanalatyn qarttarymyzdy tıisti deńgeıde qadirleı almaı júrmiz. Meniń oıymsha, aqsaqaldar alqasy jáne ájeler alqasy sekildi uıymdar prezıdenttiń janynan qurylýy kerek. Alaıda aqsaqaldar alqasyna depýtattyqqa umtylyp jatqan adamdardy tartýdyń qajeti joq. El arasynda áli de bolsa, óziniń qasıetin saqtaǵan aqsaqaldarymyz bar. Mine osy aqsaqaldardyń basyn biriktirip, qazaqtyń ulttyq salt-dústúri men qundylyǵyn dáripteýge bolady. Aqsaqaldar alqasy qurylyp, ulttyq baǵytta jumys istegen jaǵdaıda ǵana biz óz balalarymyzdy otanshyl etip tárbıeleı alamyz», – deıdi ol.
