Búginnen bastap jeke tulǵalardyń bankrottyǵy boıynsha ótinishter qabyldaý bastalady, dep habarlaıdy «Adyrna» tilshisi.
Ótinishti egov.kz saıtynda jáne eGov Mobile men e-Salyq Azamat mobıldi qosymshalary men Halyqqa qyzmet kórsetý ortalyqtarynda berýge bolady. Ol 14 kún ishinde qaralyp, jaýaby sms habarlama túrinde keledi.
Sottan tys bankrot bolý qyzmetine bank, mıkroqarjylyq jáne kollektorlyq uıymdarǵa qaryzy bar adamdar júgine alady.
Sotqa aryzdanbaı, bankrot bolýdyń sharttary:
bereshek 1 600 AEK-ten aspaýy kerek, bıyl onyń mólsheri 5 mln 520 myń teńge;
qaryz 12 aı boıy tólenbeýge tıis;
múlik, onyń ishinde ortaq menshiktegi múligi bolmaýy shart;
bankpen qaryz boıynsha retteý jumystary júrgizilgen bolýy kerek.
Sondaı-aq alty aı boıy ataýly áleýmettik kómek alǵan azamat ta sottan tys bankrottyqqa júgine alady.
