Maslenıa — shyǵys slavıandardyń dástúrli meıramy. «Ýıkıpedııada» oǵan «Uly post aldyndaǵy (post – hrıstıandardyń as ishýdi shekteýi) aptada atalayp ótetin, ón boıyna hrıstıandyqqa deıingi slavıan mıfologııasy elementterin negiz etken meıram» degen sıpattama berilgen.
«Shyǵys slavıandardyń halyqtyq kúntizbesinde meıram qys pen kóktemniń shekarasyn aıqyndaıdy. Maslenıa katolıkterdiń «Maıly seısenbi» jáne «Mıasopýst» salttarymen «týys». Orys pravoslav shirkeýiniń kúntizbesinde bul kezeń «Syrnaıa sedmıa» dep atalady. «Mıasopýst», «Nedelıa mıasopýstnaıa», «Syrnaıa nedelıa» ataýlary Rýste «shirkeýlik» uǵymdarǵa qatysty qoldanylǵan» deıdi taǵy da Ýıkıpedııa.
Maslenıany atap ótý kúni jyl saıyn Pashany merekeleý kúnine qaraı ózgerip otyrady. Dástúrli atrıbýttary – Maslenıa tulyby, shanamen syrǵanaý, saýyq-saıran qurý. Orystar quımaq jáne qalash pisiredi.
Ýıkıpedııa «Maslenıa» meıramynyń tıpin «halyqtyq-hrıstıandyq» dep aıqyndaı túsedi.
Biz Ýıkıpedııany nege aqtaryp otyrmyz? Sebebi birneshe jyldan beri Ekibastuz qalasynyń balabaqshalarynda osy meıram turaqty túrde atalyp júr. Balabaqsha basshylarynyń kóbi muny bir shanamen syrǵanaý nemese quımaq jeý meıramy dep aldanyp júrse kerek. Dinı meıram ekenine mán berip jatqan eshkim joq.
Jalpy, Ekibastuz balabaqshalarynda Maslenıa toılaý N.Nefedova hanym qala ákiminiń áleýmettik máseleler jónindegi orynbasary bolǵan kezden beleń aldy.
Taza orys balabaqshalary atap ótip jatsa birsári deısiń ǵoı. Qazaq balabaqshalary da jyl saıyn quımaq jep jeligýin qoıar emes. Búıte berse taman qazaq balasy shoqynyp ketýi ǵajap emes shyǵar. Onsyz da Ekibastuzdyń N.Nefedova ákim orynbasary bolǵan kezde Kreenıede kıiz úı tigip, aty shartarapqa jaıylyp edi...
Qazir N.Nefedova bul qalada qyzmet istemeıdi, biraq sońynda qalǵan qurbylary onyń qaldyrǵan «rýhanı muralaryna» berik syqyldy. Máselen, qalyń qazaq eńbek etetin №21 balabaqshada «Maslenıa» bıyl ulttyq festıvaldan kem atalyp ótpegen. Sonymen birge, balabaqsha aýlasynda tulyp (chýchelo) órtelipti. Balalarǵa sirińke jaǵýǵa bolmaıdy dep úıretýdiń ornyna tulyp órtep, keri tárbıe bergen pedagogtar qaýymyna ne derimizdi bilmedik. Osydan keıin balaqaılar adamdy jaıbaraqat órteýge bolady eken degen oıda qalmasyna kim kepil?! Bul áreket jas óskindi qataldyqqa tárbıelemesine qalaı kóz jetkizemiz?!
Bul sharany balabaqsha ujymy maqtanysh qylyp áleýmettik jelige jarnamalap, «Folklorlyq mereke» dep kózboıaýshylyq jasaǵan. Vıdeoda taman qazaq balasy moıyndaryna «sýshkı» asyp alyp, balabaqsha aýlasynda dirdektep júr. Aýladaǵy jaǵalaı ústelder quımaq, qalashtarǵa toly. Jalpy, balalardyń kún sýyqta búrseńdep dalada taǵam jeýi qanshalyqty durys – ony oqyrman ózi baǵamdaı jatar.
Al bizdi zaıyrly eldiń tárbıe mekemesinde hrıstıandardyń halyqtyq meıramynyń osynshama belsendi dáriptelip júrgeni tolǵandyrady...
Nurbek Taýasar, Pavlodar oblysy
