Tarazda qalany tazalaıtyn azamattarǵa kúl-qoqys jınap, kóshe sypyrýǵa arnalǵan qarapaıym qural-jabdyqtar jetispeıdi. Barynyń ózi bútin emes. Bul týraly “Informbıýro” baǵdarlamasy jarııalady, dep habarlaıdy “Adyrna” ulttyq portaly.
Jumysshylardyń aıtýynsha, bir kúrekke on adam talassa, tisi joq tyrmanyń ornyna saýsaqtarymen jer tyrmalap júr eken. Qap berilmeı qoqysty qaltamyzǵa salamyz deıdi.
Bir arbada turǵan eki kúrek, úsh tyrma, bir sypyrǵysh búkil Jeńis saıabaǵyna bólingen qural. Al jumysqa elý adam jumyldyrylǵan. Biraq kóbi adam qarasyn kóbeıtip qur júr. Jalqaýlyqtan emes jaǵdaıdyń joqtyǵynan. Sypyra-sypyra saby qalǵan sypyrǵysh, tisi ketik tyrma, synyq kúrek, tozǵan tehnıkany basshylyqqa talaı aıttyq deıdi jumysshylar. Alaıda ózgergen dáneńe joq bolsa da, muntazdaı tazalyqty talap etý ózgermepti. Qoǵamdyq jumysshylar Tarazǵa Astanadan mártebeli meımandardyń jıi kelýin tileıdi. Óıtkeni sol kúni sý jańa qural-saımandy bolyp qalamyz deıdi.
“Biraq keshe Prezıdent kelgen kezinde biz alǵanbyz. 15 tachka, 10 shaqty kúrek. Prezıdent saıabaǵy, Kóne Taraz arbaty sııaqty aımaqtarǵa bólingen”, – deıdi "Jasyl El" JShS demalys oryndary jáne kóshe tazalyǵyn saqtaý meńgerýshisi Araılym Arystanova.
Soedaı-aq, jumysshylar bazada eshqandaı jaǵdaı jasalmaǵanyna da qapaly.
“Bazasynda jaǵdaı jasalmaǵan. Shatyry joq. Tozyp tur. Tehnıkalardyń bári dalada turady. Mýsorovoz aıdaımyn. Qazir remontty kútip turmyn. Osylaı turǵanyma bir aı boldy. Bizge qosalqy bólshekterdi ýaqyty ákelmeıdi”, – deıdi Jaıdar Qaıyrbekov.
Jylarman jaǵdaıyn aıtqan jumysshylarǵa basshylyq mekemeniń odan beter bar máselesin aıtyp sher tarqatty. Aıtýynsha, sońǵy tórt jylda jumysshylarǵa jalaqydan ustalatyn áleýmettik tólemniń bir tıyny da tólenbegen. Mekeme qaryzǵa belshesinen batqan. Tipti esepshoty buǵattalyp, búginde sot sheshimimen ońaltý jaǵdaıynda tur. Osylaısha burynǵy basshylyqtyń bylyǵyn birtindep sheshýdemiz deıdi.
“Josparymyz boıynsha 3-shi kvartalǵa deıin biz tolyq jabýymyz kerek. Birinshi orynda salyq, áleýmettik paket deıdi, zeınataqy aýdarý deıdi, medıınalyq saqtandyrý deıdi sonyń bárin beremiz dep josparǵa kirgizdik. Qalalyq qarjy bólimimimen bekitip alǵanbyz”, – deıdi "Jasyl El-Taraz" JShS dırektory Azamat Ábishov.
Al qural-saıman máselesi boıynsha memlekettik satyp alý zańyna sáıkes konkýrs endi oınatylypty. Týra maǵynasynda eki qolǵa bir kúrek tappaǵan jumysshylar endi sál shydasa, bárin bútindeımiz dep sendirdi.
