Qazaqstan Túrkııaǵa 250 tonna gýmanıtarlyq kómek jiberedi. Bul týraly Túrkııanyń elimizdegi tótenshe jáne ókiletti elshisi Ýfýk Ekıdjı elshilikte ótken baspasóz máslıhatynda málimdedi, dep habarlaıdy "Adyrna" ulttyq portaly BAQ.KZ-ke silteme jasap.
Qazaqstan memleketi jer silkinisiniń ekinshi kúni Túrkııaǵa 41 adamnan turatyn alǵashqy izdeý-qutqarý tobyn daıyndap, jiberdi. Eki kúnnen keıin ekinshi komanda da Túrkııaǵa ketti. Izdeý-qutqarý jumystaryna barlyǵy 100 adam men 6 ıtten turatyn top qatysty. Osy oraıda qutqarýshylarǵa, qurmetti QR Tótenshe jaǵdaılar mınıstrine, olardyń jumysy úshin alǵys bildiremin. Úlken jankeshtilikpen jáne tabysty túrde óz qyzmetterin atqarǵan qutqarý toby kóptegen adamdardyń ómirin saqtap qaldy jáne otandastarymyzdy úıindiler astynan shyǵardy. Qutqarýshylar tobyn ótken jeksenbi kúni, túnde Astanaǵa oralǵan kezde áýejaıda qarsy aldyq, - dep atap ótti elshi.
Sondaı-aq elimiz qansha kólemde gýmanıtarlyq kómek bergenine toqtaldy.
Sonymen qatar Qazaqstan 1 mln dollar kóleminde resmı aqshalaı kómek kórsetti. Úkimet usynǵan qosymsha 55 tonna gýmanıtarlyq kómek te ótken demalys kúnderi jer silkinisi aımaǵyna jetkizildi. Bizdiń elshilik pen bas konsýldyqtarymyzǵa qazaqstandyq eriktiler ákelgen gýmanıtarlyq júkter kezegimen elimizge jiberildi jáne AFAD-qa tabystaldy. Jınaqtalǵan gýmanıtarlyq júkterdiń edáýir bóligi Qazaqstan Ulttyq ulanynyń qolbasshylyǵy bólgen ushaqtarmen jetkiziledi. Búgin Astanadan alǵashqy ushaq ushyp shyqty. Erteń Almatydan taǵy bir ushaqty jiberý josparlanýda. Osy jetkizilimdermen birge Qazaqstannan barlyǵy 250 tonnaǵa jýyq gýmanıtarlyq kómek jóneltiletin bolady, - dedi Ýfýk Ekıdjı.
Belgili bolǵandaı, atalǵan qajetti zattardyń ishinde qazirgi kezde eń qajeti –shatyrlar, kórpeler, tósek qaptary, generator, jylytqyshtar bar. Qazaqstan Úkimeti sondaı-aq jyljymaly dárethana men tósek jabdyqtary sııaqty asa qajetti zattardy jiberdi.
Zattaı kómekten basqa, Qazaqstan turǵyndary da aqshalaı kómek kórsetýde. Osy ýaqytqa deıin AFAD-tyń jer silkinisi úshin ashylǵan arnaıy resmı shotyna shamamen 5 mln dollar kelip tústi. Osy oraıda men Aqparat jáne qoǵamdyq damý mınıstrligine erekshe alǵys aıtqym keledi. Olar bastaǵan naýqanmen jáne olar ashqan shot arqyly olar bizdiń qarajat jınaý naýqanyna úlken qoldaý kórsetti, - dedi ol.
"Adyrna" ulttyq portaly
