Bıylǵy 19 naýryzda ótetin Májilis jáne maslıhat depýtattaryn saılaýǵa túrli qoǵamdyq uıymdar baqylaýshylyq jasaýǵa belsene kirisip jatqany belgili. Solardyń qatarynda «BAQYLA» Qoǵamdyq qozǵalysy da bar. Qazirdiń ózinde atalǵan qozǵalys óz baıqaýshylaryn daıyndaýǵa kirisip ketkenin málimdedi, dep jazady "Adyrna" ulttyq portaly.
Qoǵamdyq qozǵalystyń Ortalyq shtaby Almaty qalasynda ornalasqan. Sondaı-aq elimizdiń 17 qalasynan óńirlik shtabtar ashylǵan.
Buǵan deıin «BAQYLA» Qazaqstannyń prezıdentin saılaý kezinde baqylaýshylyq jasap, 27 qalada daýys berý proesin qadaǵalaý jumysyn sátti atqarǵan bolatyn.
Qazirgi kúni baqylaý jelileriniń basshylary men óńirlik úılestirýshileri saılaý proesin baqylaý teorııasy men praktıkasy boıynsha arnaıy kýrstardan onlaın formatta jáne oflaın kezdesýler arqyly ótip jatyr.
Biz qoǵamdyq qozǵalystyń baqylaýshylaryna sabaq ótkizip, trenıng júrgizip júrgen saıasatker, qoǵam qaıratkeri Dos Kóshimnen az-kem pikir alǵan edik.
Dos Kóshim:
- Kesheden bastap oblys, qalalardaǵy úılestirýshilerdi oqytýdy bastadyq. «BAQYLA» Qoǵamdyq qozǵalysy – Qazaqstannyń kóptegen negizgi qalalaryn, oblystaryn qamtıtyn birlesken baqylaý ortalyǵy ǵoı. Sondaǵy adamdardy oqytyp jatyrmyz. Keshe 25 óńirdiń úılestirýshileri qatysty. Almaty qalasyndaǵylarmen biz tikeleı kezdesip, semınar sabaqtaryn ótkizemiz. Al qalǵan óńirler boıynsha onlaın trenıgter ótedi.
Árıne, meniń mindetim tek oqytý, eger uıymdastyrýshylar basqa aımaqtarǵa oflaın ótkizýdi josparlasa, oǵan barýǵa daıynbyz. Qansha ret sabaq ótkizemiz degenge kelsek, ol ártúrli bolýy múmkin. Mysaly, ótken jyly prezıdent saılaýy aldynda 4-5 ret semınar boldy, onyń ishinde 2-3 tikeleı oflaın ótti. Negizinen oblys, qalalardaǵy adamdarmen birlesip, bir jeli quryp, baılanysqannan keıin, bárin birge oqytqan durys. Biraq biz oǵan deıin «BAQYLA-ǵa» qosylam degenderdi jeke oqytyp jatyrmyz. Bul artyq bolmaıdy. Eger qozǵalysqa qosylam degender uıymdar, jeke adamdar bolsa, biz olarǵa jeke sabaqtar júrgize beremiz. Iaǵnı 4-5 sabaqpen shektelip qalmaımyz.
Almatydaǵy baqylaýshylardy tikeleı jolyǵyp, daıyndaımyz. Aldaryna ústeldi qoıyp, qalaı sanaý keregin kórsetip, tek teorııa júzinde emes, praktıkalyq sabaqtar ótkizemiz. Bul óte tıimdi. Kózbe-kóz suraqtaryna jaýap berip, qatysýshylardyń pikir, usynystaryn tyńdaý bir bólek. Onlaın ótkizgen ýaqytta, ókinishke oraı, suraqtar kóp bolmaıdy.
Jalpy aıtarym, qoǵamdyq qozǵalystardyń kóp bolǵany durys. Kezinde baqylaý jumystaryn biz 1999 jyly bastaǵan edik. Qurylǵan uıymdar keıbiri ketedi, keıbiri qalady. Al bireýleri birigip jatady. Báribir alǵa damý bar. Ósý bar. Baqylaýshylyq qozǵalystardyń shama kelgenshe jolyn ashý kerek. Olardy ár ýaqytta qoldaýymyz kerek. Ózim baıqaýshylyq jasaıtyn uıymdardyń kóbeıgenin qup kóremin.
Men bir baqylaýshylyq uıymǵa jınalyńyzdar dep aıtpaımyn, biraq saılaý ýchaskelerine baqylaýshy qoıar kezde úılestirýshiniń jumysy asa qajet.
Óıtkeni, bir ýchaskede 5 adam otyrsa, kelesi ýchaskede eshkim otyrmaıdy. Ony byltyrǵy saılaýda kórdik. Mysaly, Almaty boıynsha 5-6 baıqaýshylar uıymy bar desek, solar retimen bólinip, barlyq daýys berý ýchaskesin jaba alatyndaı bolsa, jaqsy bolar edi. Sony uıymdastyrý sharýasy júrgizilýi kerek. Bizge baılanysyp, birge jumys isteýde áli de problema bar dep oılaımyn.
Ár saılaý pýnktinde mynansha adam otyrý kerek degen zań joq. Tek ár uıymnan bir ǵana baqylaýshy bolýy kerek. Aldaǵy saılaýdy baqylaımyz dep otyrǵan 5-6 qoǵamdyq qozǵalys bar. Sodan soń Májilis pen maslıhatqa túsip jatqan úmitkerlerdiń baqylaýshylary bar. Sonymen bir daýys berý ýchaskesinde kem degende 6-7 adam otyratyn sııaqty. Bul óte jaqsy úrdis. Daýys berýdi baqylaǵan adamnyń kózi ashylady. Saılaýdyń ne ekenin biledi. Azamattyq kózqarasy oıanady. Sondyqtan únemi azamat bolǵyń kelse baqylaýshy bol dep júremin.
"Adyrna" ulttyq portaly
