Túrmede ózine qol jumsaǵan sottalýshynyń asqazanynan sońǵy haty tabylǵan. Bul týraly 31 arnanyń "Informbıýro" jańalyqtar qyzmeti jarııalady, dep habarlaıdy “Adyrna” ulttyq portaly.
Almaty oblysynda 155/8 túzeý mekemesinde jazasyn ótep jatqan sottalýshy Árken Qarasaı ózine-ózi qol salǵan. Ári marqum týǵan aǵasyna aqtyq demi shyǵar aldynda sońǵy hatyn joldap úlgeripti. Onda mundaı aýyr qadamǵa barýyna naqty kimderdiń sebep bolǵanyn ashyq jazǵan. Iaǵnı, túrme qyzmetkerleri sottalǵandardy uryp-soǵyp, balaǵattap ózderine jumys isteýge májbúrleıdi eken. Al marqum bul azaptan qutylýdyń jalǵyz joly óz ómirin qurban etý dep sheshken. Mekeme basshylyǵy bolsa, marqumnyń minezi de, minezdemesi de jaqsy edi dep otyr. Aıtýlarynsha, onyń nelikten sýııd jasaǵanyn bilmeıdi.
Árken Qarasaı 2021 jyldan beri LA-57 155/8 túzeý mekemesinde jazasyn ótep kelgen. Al 15 aqpan kúni tańǵy 4-ter shamasynda aǵasyna óz-ózine qol salmaqshy ekenin habarlapty. Óıtkeni túrmegi zorlyq-zombylyq pen qysymǵa shydaı almadym degen. Iaǵnı, mekeme qyzmetkerleri sottalǵandardy uryp-soǵyp, namysyn taptaýdy ádetke aınaldyrǵanyn aıtqan. Ári oǵan naqty kimderdi kinálaý qajettigin de jazǵan. Sóıtip, 4 qyzmetkerdiń atyn atapty.
"Osyǵan jetkizgen mekeme qyzmetkerleri. Atap aıtatyn bolsaq, Jasulan Qabylovıch, Álipbaevıch, Samat Tólegenovıch, Birjan Baqytjanovıch. Osy esimdi kisiler meni tynysh ómir súrgizbeıdi. Bul mekemeniń zańy sol kisiler" , - dedi Qylmystyq atqarý júıesi departamenti Almaty jáne Jetisý oblysy boıynsha departamenti bastyǵynyń orynbasary Jánibek Qosjanov.
