ASTANAǴA ODA

2574
Adyrna.kz Telegram

Beý, Astana, shaharym!
Ashtarhandaı búgin seniń ataǵyń.
Úrketuǵyn Úrimiń men Máskeýiń,
Nur-qala dep, bir qala dep has-kerim
Madaqtaımyz eresen!

Biraq endi...
artyq aıtty deme sen,
Tiliń sál-sál orysshalaý demeseń
Týysqanǵa óris tar-aý demeseń.
Para alǵyshtar jaqsy orynda demeseń,
Baılyǵymyz jat qolynda demeseń.
Tirlik qurǵyr mardymsyzdaý demeseń,
Aıarlyqtan ar qunsyzdaý demeseń
Seni tipti jaman qala demes em!

Dańǵazadan kende emessiń,
degenmen,
Men ózińdi maqtar bolsam óleńmen
Renjı me, tastaı salyp arbasyn,
Bazardaǵy arba ıtergen qandasym.
Qaryndasym eden jýǵan keńsede,
Kelispeıdi menimenen ólse de...
Jalaqysy jambaspuldan qalmaǵan,
Jerlesterim “jetim burysh” jaldaǵan...

Jaılap jatqan kileń sabaz, serimen,
Desem seni: tóre shyǵar tórim eń.
Janyńdaǵy jyrtyq shekpen aýyldar,
Daýlasa ma menimen?!.

Álde sózim bolsynshy dep ótimdi,
Aqordaǵa buryp alyp betimdi.
Aǵytam ba aıhaı, maqtaý ne túrli,
Ataqqumar aqyn aǵam sekildi!

Qurysyn!
Myqtylarda meniń qansha jumysym.
Aıtqanym jón durysyn:
...Qyzdarmenen tánin satqan kúni úshin
Qurylystarda qulap ólgen ul úshin!

Eı, Astana, dúr qabaq!
Mań dalada mańǵaz tursyń mundalap,
Berdim deısiń bekke baılyq, qulǵa baq.
Men de keıde saǵan ketkim keledi,
Ereımenniń tóbesinen bir qarap!

Tipti buǵan kerek emes mol shydam,
Kósher edim bóle qashyp qońsydan.
...Beısbolka kıgen bekzat baýyrdaı,
Golf soǵa bilmegesin qorsynam!

Brıtandyq qoıshylardyń ónerin,
Bilmegesin, qaıtem endi, kónemin!
(Ermegi bul tektiler men tóreniń)
Men ulymyn asyq atqan dalanyń,
Bilmeýimniń aıtar bolsam sebebin!
Analardan tómenirek kólemim,
Qaı betimmen sosyn saǵan kelemin?!

Eı, Astana, el sener!
Seni salǵan bir sáýletshi eń sheber.
Sol arada biz bilmeıtin myqtylar,
Sol arada biz kirmeıtin keńseler!
Dárejesi dollarmenen ólshener,
Sol jerde júr talaı-talaı eńseli er!
“Aqsha-qala” dep atar em ózińdi,
Maǵan bılik berse eger!

Bizden ózin sál bıikteý sanaıtyn,
Adamdaryń zor tipten.
Sheneýnigiń shekesinen qaraıtyn,
“Madamdaryń” “mersedesin” móńkitken

Beý, Astana!
Qazaǵymnyń murady!
Jarqyraǵan óndirli eldiń shyraǵy,
Sarqyraǵan “tenderlerdiń” bulaǵy.
Jaqsylar men jaısańdardyń turaǵy!
Turmaǵasyn bosaǵańda ilinip,
“Aıaz bıdiń tymaǵy”,
Eldiń saǵan tarqamaı júr kúmáni!

Eı, Bas qala!
Baýyr úshin bolǵannan soń baspana,
Men ózińdi almastyrman basqaǵa!
Aıyp etpe, jazylmasa jaqsy óleń,
Tartylǵandaı taspaǵa...
Bir urty – maı, bir urty – qan Qazaqqa,
Dál ózińdeı jarasyp tur astana!

Saılaý Baıbosyn

Pikirler