Adai Äbıldinovtıŋ animasiia turaly şaǧymyna «ŪKQMO» komplaens-qyzmetı tüsınıkteme berdı, dep habarlaidy “Adyrna” ūlttyq portaly.
«ŪKQMO» KEAQ komplaens-ofiserı Marat Kamzoldaev «Qazaqstan animasiialyq studiialar qauymdastyǧy» QB töraǧasy Adai Äbıldinovtıŋ "ŪKQMO" KEAQ-nyŋ qyzmetıne şaǧymdaryna tüsınıkteme berdı.
“Aǧymdaǧy jyldyŋ 18 qaŋtarynda Qazaqstannyŋ animasiialyq studiialary qauymdastyǧynyŋ töraǧasy Adai Äbeldinov özınıŋ Facebook paraqşasynda «Chto ne tak s animasiei?» taqyrybynda post jariialady. Postta körsetılgen A.Äbeldinovtıŋ "ŪKQMO" KEAQ-nyŋ qyzmetıne şaǧymdaryn eskere otyryp, jaǧdaidy tüsındıru qajet dep sanaimyz.
2022 jylǧy konkurstyq ırıkteudıŋ nätijesınde «Aşina. Legenda o nebesnyh volkah» («Dala Animation» JŞS), «Örkeş» («Aday Production» animasiialyq ortalyǧy») jäne «Almaly» («Kemel Production» JŞS) animasiialyq jobalary memlekettık qarjylandyruǧa ie boldy.
Tiıstı jūmystardy atqarǧannan keiın, joǧaryda atalǧan kompaniialar ŪKQMO-na şyǧarmaşylyq esepterın ötkızdı. Alaida ŪKQMO-nyŋ qyzmetkerlerı esepterdı tekseru barysynda öreskel būzuşylyqtardy anyqtady, sonyŋ ışınde plagiat, «Qazaqanimasiia» şyǧarmaşylyq bırlestıgı aiasynda öndırıske engızılgen jobalardan kontenttı köşıru qaupı. Sonymen bırge osy üş joba boiynşa ötkızılgen jūmystar men olardyŋ öndırısıne bölıngen qarajat säikes kelmeidı.
Atalǧan mäsele boiynşa täuelsız saraptamanyŋ qorytyndylary alynyp, «ŪKQMO» KEAQ janyndaǧy Saraptamalyq keŋestıŋ arnaiy otyrysy ötkızıldı. Saraptamalyq keŋestıŋ müşelerı ūsynylǧan barlyq qūjattarmen tanysyp şyǧyp, ŪKQMO basşylyǧynyŋ osy mäsele boiynşa pozisiiasyn qoldady, ol tiıstı hattamada körsetılgen. Osy jaǧdailardy eskere otyryp, ŪKQMO-nyŋ zaŋgerlerı «Dala Animation», «Aday Production» jäne «Kemel Production» kompaniialaryn josyqsyz önım beruşı retınde tanu turaly sotqa talap aryz jıberdı.
Animasiialyq studiialardyŋ jūmysyn josparly türde būǧattau turaly küdıkke keletın bolsaq, Qazaqstannyŋ animasiialyq studiialar qauymdastyǧynyŋ töraǧasy Adai Äbeldinovtyŋ özı "ŪKQMO 2020 jylǧy konkursynyŋ qorytyndysy boiynşa öndırıske bes animasiialyq joba ıske qosyldy, olardyŋ ärqaisysy ūlttyq ruhty nyǧaitu maqsatyna qyzmet etedı" dep aitqan bolatyn. Öz kezegınde, ŪKQMO janyndaǧy Saraptamalyq keŋestıŋ töraǧasy, Qazaqstannyŋ Halyq ärtısı Doshan Joljaqsynov otandyq kinonyŋ sapasy turaly söz qozǧaǧanda, qazaqstandyq animasiiany erekşe atap ötken bolatyn, äsırese 2022 jylǧy baiqauda segız animasiialyq joba qoldau tapqany atap ötılgen”, delıngen tüsınıktemede.
