Elimizde jastardy jumysqa ornalastyrý is-sharasyna ózgerister engizildi. Bul týraly QR Premer-Mınıstriniń orynbasary Altaı Kólginov málimdedi, dep habarlaıdy «Adyrna» tilshisi.
Aıtýynsha, oqýdy endi bitirgen tájirıbesiz jastardyń bári birdeı jumysqa tura almaıdy.
«Osy úshin «NEET jastar» uǵymy (oqymaıtyn, jumys istemeıtin jáne biliktiligi joq jastar) zańnamalyq túrde bekitilgen. Jastardyń basym bóligin memlekettik qoldaý sharalarymen qamtý úshin Memleket basshysynyń tapsyrmasy boıynsha olardyń jasy 35 jasqa deıin ulǵaıtyldy. Osylaısha, jastar sany 5,7 mln adamǵa deıin ósti»,—dedi ol.
Altaı Kólginov bul másele boıynsha qandaı sharalar qabyldanyp jatqanyn atap ótti.
«Birinshi. 2022 jyldyń naýryz aıynan bastap «Jastar praktıkasy» (6 aıdan 12 aıǵa deıin, 25-ten 30 AEK-ke deıin) jáne «Alǵashqy jumys orny» (12-den 18 aıǵa deıin, 20-dan 30 AEK-ke deıin) jobalary boıynsha uzaqtyǵy men jalaqysy ulǵaıtyldy. Bul sharalar 177 myńnan astam jasty jumysqa (onyń ishinde 107 myńnan astamy turaqty jumys oryndaryna) ornalastyrýǵa múmkindik berdi.
«Bastaý bıznes» jobasy aıasynda 70 myńǵa jýyq jas onlaın-oqytýdan ótti; «Jasyl el» jobasy boıynsha 2025 jylǵa deıin jyl saıyn eldi mekenderdi abattandyrý maqsatynda aqyly maýsymdyq jumysqa 30 myń jas jumyldyrylatyn bolady.
Ekinshi. Memleket basshysynyń tapsyrmasy boıynsha 21 jastan 35 jasqa deıingi jastar úshin jyldyq 2,5% jeńildikpen shaǵyn nesıe berý tetigi engizilýde. Nesıeniń eń joǵary somasy – 5 mln teńgege deıin. 2023 jyly 6 myńǵa jýyq shaǵyn nesıe berý josparlanyp otyr.
Óz bıznesin ashý úshin 12 myńnan astam jasqa 400 AEK (1 mln 200 myń teńgeden astam) mólsherinde granttar berildi.
Úshinshi. Jańa áleýmettik kodeks aıasynda 3,3 mln-nan astam adamdy, onyń ishinde 2,3 mln jasty jumysqa ornalastyrý josparlanyp otyr. Naqtyraq aıtqanda, ulttyq jobalar men bıznestiń jeke bastamalary aıasynda qurylatyn jańa jumys oryndary, memleket sýbsıdııalaıtyn jumys oryndary, óz isin ashýǵa arnalǵan quraldar; jumys kúshiniń tabıǵı rettelýine baılanysty bos oryndar jáne t.b.
Tórtinshi. 2 qalada jáne 6 oblysta jastarǵa arnalǵan óńirlik turǵyn úı baǵdarlamalary iske qosyldy»,—dedi Premer-Mınıstrdiń orynbasary.
Sóz sońynda ol Memleket basshysynyń jastardy jumyspen qamtý jáne áleýmettendirý máselelerin erekshe baqylaýda ustaıtynyn atap ótti.
