«Bız bırgemız Fest»: Kenjebek Nūrdoldaiǧa 2 bölmelı päter kıltı tabystaldy

Astanada «Bız bırgemız Fest» atty muzykalyq qaiyrymdylyq festivalı öttı. Onda älemgetanymal änşı Dimaş Qūdaibergen jäne basqada qazaqstandyq estrada jūldyzdary men mügedektıgı bar ärtıster öz önerlerın körsettı. Is-şaraǧa Parlament Senatynyŋ Töraǧasy Mäulen Äşımbaev qatysty. Ol öz sözınde balalardyŋ äl-auqaty, olardyŋ intellektualdyq, şyǧarmaşylyq jäne ruhani damuy ūltymyz üşın maŋyzdy basymdyqtar ekenın aitty.

«Qazırgı taŋda elımızde memlekettıŋ äleumettık saiasatynyŋ basymdyqtary turaly tüsınık özgerıp jatyr. Ädılettı Qazaqstan degenımız - eŋ aldymen, inkliuzivtı Qazaqstan. Bız kömekke mūqtaj är azamat, är bala memlekettıŋ qamqorlyǧyn sezınuge tiıs qoǧamqūryp jatyrmyz. Memleket basşysy Qasym-Jomart Kemelūly Toqaev osyndai mındet jüktep otyr. Sondyqtan memleketerekşe qajettılıgı bar adamdardy qoldap, kedergısız orta jäne inkliuzivtı qoǧam qalyptastyru üşın tiıstı jūmysty jalǧastyra beredı», – dedı Mäulen Äşımbaev.

Ötken qaiyrymdylyq konsertınen jinalǧan qarajat jaŋadan aşylyp jatqan “Bız bırgemız” reabilitasiialyq ortalyǧyna medisinalyq apparattar alynady.

“Qaiyrymdylyq qor 3 jyldan berı mümkındıgı şekteulı balalarǧa kömektesıp keledı. Al biyl balalar jylyna orai erekşe talantty jastarymyz ben älemge kök tuymyzdy jelbıretıp jürgen jūldyzdarymyzdyŋ basyn bırıktırıp, ülken arenada konsert ūiymdastyrudamyz” -, dedı qor basşysy Perizat Qairatqyzy.

Konsertke arnaiy kelgen tua bıtken zaǧip jan Kenjebek Nūrdoldaidyŋ anasyna sahnada 2 bölmelı päterdıŋ kıltı tabystaldy. Tik-tok äleumettık jelısı arqyly tanylǧan erekşe dauys iesı Kenjebek Nūrdoldai  soŋǧy uaqytta reseilık telearnalardan da jiı körınıp jür.

“Qazır qaiyrymdy jandar öte köp. Erekşe talantyŋmen tanylsaŋ halyq arasynan arqaŋnan qaǧatyndar tabylady. Eŋ bastysy eŋbek etseŋ, Alla ary qarai jolyn körsetedı” -, deidı jas änşı.

Erekşe jandardy qoldau arqyly adamdardyŋ janyna jylulyq syilau – basty maqsatymyz dep sahnada köz jasyna erık bere söz alǧan  Perizat taǧy bır otbasyǧa  1 bölmelı päterdıŋ kıltın tabys ettı. 3 ailyq balasymen taksi jürgızuşısı bolyp näpaqasyn tauyp jürgen jalǧyzbasty ana Asel öz quanyşyn jasyra almady. Festival aiasynda Qaraqat saz mektebı, Tamara Asar, Nazima, Mona Songs, Aidyn,  Alfa toby syndy änşıler de qaiyrymdylyqqa atsalysqandaryn quana jetkızdı.

«Bügıngı keşke arnaiy şaqyrtumen 100 jetıgenşı şäkırtımmen konserttı aşyp berdık. Bızdıŋ maqsatymyz balalardy ūlttyq önerge baulu, äsırese mümkındıgı şekteulı büldırşınderdı qoldauǧa qaşan da daiynbyz. Osyndai igı, ızgı amaldar köp bolsa eken» - degen tılek bıldırdı änşı Qaraqat Äbıldina.

Köpke tanymal «5:32» serialynyŋ akterlerı Mansūr jäne Qobylandy da ıs-şaradan şet qalmady.

«Jastar jaqsylyq jasap jarysyp jatyr. Ata-babamyzdan kele jatqan meiırımdılık qasietımızdı joǧaltpai, damyta bereiık» - deidı olar. “Qaiyrymdylyq degen qaraŋǧydan jaryq säule ızdegendei ǧoi. Jas kezımde özım de osy kezeŋnen öttım. Sondyqtan osyndai keşterde än şyrqasam tebırenıp ketemın.” -, dep Tamara Asar äserımen bölıstı.

Keş soŋynda jobanyŋ basty qonaǧy Dimaş Qūdaibergen öner körsetıp, erekşe qoldau bıldırdı. Dimaşty körermen ystyq yqylaspen qarsy alyp, änderın bır demmen tyŋdady.

 “Bügıngı keştıŋ ūiymdastyruşylaryna alǧys bıldıremın. Jürekterıŋızdegı meiırımdılık oty sönbesın. Elımız ärqaşan bırlıkte bolsyn. Eŋ bastysy säbilerımız jylamasa eken, auyrmasa eken degen tılegım bar.   Ülken merekelerde amandyqta, tynyştyqta qauyşa bereiık.”-, deidı Dimaş.

Şarany Biz Birgemiz Qazaqstan qoǧamdyq qory jäne Astana qalasynyŋ äkımdıgı ūiymdastyrdy.

"Adyrna" ūlttyq portaly