Memleket basshysy ǵalym, qoǵam qaıratkeri Amangeldi Aıtalynyń otbasy men jaqyn týystaryna kóńil aıtý jedelhatyn joldady. Bul týraly Aqordanyń baspasóz qyzmeti málimdedi, dep habarlaıdy “Adyrna” ulttyq portaly.
Qasym-Jomart Toqaev asa kórnekti ǵalym, qoǵam qaıratkeri, Qazaqstan Respýblıkasy Parlamenti Májilisiniń II jáne III shaqyrylymdarynyń depýtaty Amangeldi Aıtalynyń dúnıeden ótýine baılanysty onyń otbasy men jaqyn týystaryna kóńil aıtty.
«Amangeldi Ábdirahmanuly uzaq jyldar boıy bilim jáne ǵylym salasynda jemisti jumys istedi. Sonyń ishinde Aqtóbe memlekettik pedagogıkalyq ınstıtýtynda joǵary bilikti mamandar daıarlaý isine mol eńbek sińirdi. Májilis depýtaty bolǵan kezinde otandyq zańnamany jetildirýge jáne parlamentarızmdi damytýǵa atsalysty. Qajyrly qyzmetimen elimizdiń órkendep damýyna óz úlesin qosyp, sońyna jarqyn iz qaldyrǵan Amangeldi Ábdirahmanulynyń esimi men beınesi umytylmaıdy. Marqumnyń ımany salamat, jany jánnatta bolsyn», – dep jazylǵan jedelhatta.
