Qaraǵandydaǵy tóbeleske kúdiktilerdiń biri, halyqaralyq izdeý jarııalanǵan Narek Gýrýrıan ustaldy. Bul týraly "Azattyq" radıosy habarlaıdy. Ishki ister mınıstriniń ókili Sadýbaevtyń aıtýynsha, "Armenııa azamaty Narek Gýrýrıan Reseıdiń Omby oblysynyń aýmaǵynda ustalǵan. Qazir ony Qazaqstanǵa ákelý jumystary uıymdastyrylyp jatyr".
Ishki ister mınıstrliginiń habarlaýynsha, Gýrýrıan 1 qańtar túngi 10-da Qazaqstannan Reseıge ótip ketken.
Jańa jyl túni Qaraǵandydaǵy meıramhanalardyń birinde bolǵan tóbeles saldarynan bir adam qaza taýyp, tórt adam jaralanǵan. Bul oqıǵaǵa qatysy bar degen kúdikpen segiz adam ustalǵan. Taǵy bir kúdikti Narek Gýrýrıanǵa halyqaralyq izdeý jarııalanǵan. 6 qańtarda Qaraǵandyda júzdegen adam "qylmyskerdi" tabýdy talap etken. Qaraǵandy oblysy ákimi Erlan Qoshanov izdeý jumystary júrip jatqanyn aıtqan.
7 qańtarda ınternette Narek Gýrýrıan esimdi adam vıdeoúndeý jarııalap, "tóbeleskender arasynda bolǵanyn, biraq kisi óltirmegenin" aıtqan.
8 qańtarda Astanada ótken brıfıngte Ishki ister mınıstriniń birinshi orynbasary Janat Súleımenov janjaldyń ultaralyq sıpaty baryn joqqa shyǵarǵan.
"Janjal turmystyq sıpatta órbigen. Bir tarapta bir ǵana ulttyń, ekinshi tarapta ózge bir ulttyń ǵana ókilderi tóbelesti degen jaǵdaı bolǵan joq. Biz tergeý kezinde bul týraly aıtqan joqpyz, sebebi barlyǵyn anyqtap alǵymyz keldi. Tergeý áli júrgizilip jatqandyqtan, egjeı-tegjeıli aqparat bere almaımyz" dedi Súleımenov.
9 qańtarda Qazaqstan ishki ister mınıstri Qalmuhanbet Qasymov pen Armenııanyń Qazaqstandaǵy elshisi Gagık Galachıan kezdesken.
