Memleket basşysy Qasym-Jomart Toqaev barşa qazaqstandyqty Täuelsızdık künımen qūttyqtady, dep habarlaidy «Adyrna» tılşısı.
«Qūrmettı otandastar! 1991 jylǧy 16 jeltoqsan – töl tarihymyzdaǧy mereilı beles. Būl – egemen el boludy aŋsaǧan ata-baba armany aqiqatqa ainalǧan ūly kün. Täuelsızdık künınıŋ airyqşa män-maǧynasy bar. Azattyq üşın arpalysqan ūlt perzentterın el jadynda mäŋgı saqtau – qasiettı paryzymyz. Olardyŋ otanşyldyq qasietı – bügıngı jäne bolaşaq ūrpaqqa ärdaiym ülgı-önege. Bız tamyry tereŋ memlekettıgımızdıŋ maŋyzdy belesterın ūlyqtap, ūltty ūiystyratyn ortaq qūndylyqtardy nyǧaita beremız. Sol arqyly qasterlı Täuelsızdıgımızdıŋ tūǧyryn biıktete tüsemız. Täuelsızdık – baǧa jetpes bailyq. Bärımız ony közdıŋ qaraşyǧyndai saqtauymyz kerek. Memleketımızdıŋ egemendıgın, elımızdıŋ amandyǧy men jerımızdıŋ tūtastyǧyn qorǧau – är azamattyŋ qasterlı boryşy. Biyl elımız üşın betbūrysty jyl boldy. Būryn-soŋdy bolmaǧan syn-qaterlermen betpe-bet keldık. Eldıgımızge ışten de, syrttan da zor qauıp töndı. Degenmen myzǧymas bırlık pen yrys-yntymaqtyŋ arqasynda barlyq qiyndyqty eŋserıp kelemız. Bız auqymdy saiasi jäne ekonomikalyq reformalardy qolǧa alyp, memleketımızdı jaŋǧyrtudyŋ jaŋa kezeŋıne qadam bastyq. Būl bastamalardy tabysty jüzege asyru – ärqaisymyzdyŋ qolymyzda. Egemen elımızdı odan ärı damytu – aldymyzda tūrǧan basty mındet. Bız osy jolda aianbai eŋbek etuımız qajet. Sonda ǧana Qazaqstan quatty memleketke ainalady. Barşaŋyzdy bügıngı ūlyq merekemen şyn jürekten qūttyqtaimyn! Sızderge zor densaulyq, baq-bereke tıleimın! Qazaqstanymyz örkendei bersın! Qasiettı Täuelsızdıgımız mäŋgı bolsyn!»— dedı Prezident.
