Áleýmettik jelide Herson qalasyn basqynshylardan azat etip, ortalyq alańǵa jeńis baıraǵyn tikken azamattardyń vıdeosy tarady. Ýkraına qarýly kúshteriniń dańqty jeńisin toılaǵandardyń qýanyshynda shek joq. Bul jaıly "Adyrna" ulttyq portaly habarlady.
"Ýkraına jasasyn!", "Qaharmandar jasasyn!" lepesi búgingi Herson halqynyń uly uranyna aınalǵandaı. Qala halqy Ýkraına qarýly kúshteriniń dańqty jeńisin toılatyp jatyr. Olar ortalyq alańdar men qala ǵımarattaryna Ýkraına týyn tigip, súıinshiletý ústinde.
Basqynshylar sý, elektr júıeleri men kárizderdi jaryp ketken. Ázirge qala jaryqsyz, sý joq. Degenmen Herson qalasy turǵyndarynyń kóńilinde toqtyq bar.
Esterińizge sala keteıik, Hersonǵa bet burǵan Ýkraına áskerine qarata V. Zelınskıı kúni keshe:
"Búgin - tarıhı kún. Biz Hersondy qaıtaryp alamyz. Bizdiń sarbazdar dál qazir Hersonǵa taban tireýge daıar. Az qaldy, qalaǵa aıaq basamyz. Arnaıy jasaqtar qala ishinde júr. Hersondyqtar muny asyǵa kútti. Ýkraınadan esh bas tartpady. Ýkraına únemi artqan senimdi aqtaıdy, ózine tıesiliniń jolynda jan aıamaıdy", - dep aıtqan-tuǵyn.
"Adyrna" ulttyq portaly
