Almatyda shańyraq kótergen eki jas úılený toıyn Almaty qalasynda ornalasqan №1 Balalar úıine arnady, dep habarlaıdy “Adyrna” ulttyq portaly
Azattyq Ruhy portalynyń málimetinshe, atalmysh balalar úıinde qazirgi ýaqytta 80-nen asa bala tárbıelenip jatyr. Jastar munda úılený toıynyń shaǵyn túrin ótkizip, toıdyń áserin shynaıy túrde sezinýine múmkindik syılady. Jastar arasynda sońǵy ýaqyttary zor qyzyǵýshylyqqa ıe bolǵan maklıýbe tamaǵyn ákelip, úlken tortty da dóńgelete birge kesti.
«Búgin balalar úıine kelip úılený toıynyń shaǵyn túrin uıymdastyrdyq. Bul oıymdy kópten beri josparlap júr edim. Túrkııa elinde shańyraq kótergen eki jastyń balalar úıine baryp, qaıyrymdylyqpen aınalysqanyn estidim. Sonda osy ıdeıa sap ete qaldy. Lımýzın jaldap, artyq shyǵynǵa batyp, ysyrap jasaǵansha qoǵamǵa az da bolsyn paıda ákelýdi oıladyq, balalardyń da shynaıy qýanyshyn, kúlkisin kórgimiz keldi. Nıetimniń artynda otbasylyq qundylyqtardy nasıhattaý degen oı jatyr. Búgingi jas - erteńgi el tizginin ustar azamat. Al otan otbasynan bastalatyny belgili. Otbasyna meıirimdilik tanytqan adamnan erteń bilikti maman, eline janashyr azamat ósip shyǵady.
Oıǵa alǵan isim qalaı ótedi dep qobaljyp edim, balalardyń kóńilinen shyqqan sııaqty. Júzderindegi shynaıy kúlkini, qýanyshty baıqadyq. Qasymyzǵa kelip, tilekterin aıtyp, qushaqtap ketti. Bala perishte ǵoı, bárin shynaıy kórsetedi. Ata-ana mahabbatynan erte aıyrylsa da júzderinen kúlki ketpeıdi. Árqaısysynyń bolashaǵy jarqyn, baqytty bolýyn tileımin! Al ózim josparymnyń júzege asqanyna qýanyp otyrmyn», - dedi kúıeý jigit Madııar Qaıratuly.
Qos jas búldirshinderge arnap tanymal mýltfılm, fılm keıipkerleriniń kıimin kıgen anımatorlardy jaldap, túrli saıystar ótkizdi.
«Óz basym ysyrap jasaǵandy unatpaımyn. Joldasym ekeýimiz sóz baılasyp, aq nekemizdi qıǵannan keıin balalarǵa arnap shaǵyn toı ótkizý týraly ıdeıasyn aıtty. Men de birden qýana kettim. Úılenýdi josparlap júrgen ózge jastarǵa bul isimiz úlgi bolady degen oıdamyn», - dedi qalyńdyq Benazır Erikqyzy.
Shaǵyn toıdyń sońynda kúıeý jigit pen qalyńdyq arnaıy ázirlengen tortty kesip, dám tatqannan keıin balalarǵa úlestirip berdi
