«Aqsý» úmitti aqtady

3808
Adyrna.kz Telegram

Pavlodarlyq fýtbol qaıta jandandy. Bıyl Qazaqstannyń Premer-lıgasynda alǵashqy maýsymyn ótkizgen «Aqsý» fýtbol klýby jdankúıerler úmitin aqtap, altynshy orynǵa turaqtady. 

Birer jyl buryn Qazaqstan fýtbolyndaǵy aty ańyzǵa aınalǵan «Ertis» komandasy jyldar boıy qordalanǵan qaryzy saldarynan bankrotqa ushyraǵan edi. Bul sheshim sol kezde Pavlodar oblysy ákimi qyzmetine jańa taǵaıyndalǵan Ábilqaıyr Sqaqovqa ońaı soqpaǵan edi. Amal joq, qaryzǵa belshesinen batqan fýtbol klýbynyń jumysyn toqtatýǵa týra keldi. Jankúıerler tarapynan biraz syn da aıtylǵan edi.

«Ertistiń» orynyn «Aqsý» fýtbol komandasy basty. Onyń denin pavlodarlyq fýtbol mektebiniń túlekteri qurady. Jergilikti aıaq dop sheberleri úmitti aqtady. Byltyr birinshi lıganyń chempıondary atanyp, Premer-lıgaǵa joldama aldy. Al bıyl joǵarǵy lıgadaǵy alǵashqy maýsymynda-aqkil myqtylardyń arasynda altynshy orynǵa turaqtady.

Jankúıerlerdiń pavlodarlyq fýtboldyń bolashaǵyna degen senimi qaıta oıandy. Jurtshylyq «Aqsý» sapynda jergilikti sportshylardyń dop teýip, tájirıbe jınap júrgenine qýanady.

Maýsym aıaqtala salysymen Pavlodar oblysynyń ákimi Ábilqaıyr Sqaqov fýtbolshylarǵa jaqsy nátıje kórsetkeni úshin alǵysyn bildirdi.

«Mine, «Aqsýdyń» Qazaqstannyń Premer-lıgasyndaǵy debıýtiniń kýási boldyq. Bul maýsym ońaıǵa soqqan joq. Jarqyn, tipti, sensaııalyq jeńister de, jeńilister de boldy. Barlyǵynan sabaq aldyq. Biraq, eń bastysy, fýtbolshylarymyz eshteńege qaramastan alǵa umtyldy. Maqsat, jastyq jalyn men tájirıbe ushtasqan pavlodarlyq fýtboldy pash etý. Maqsat oryndaldy. Bul bizdiń Premer-lıgadaǵy alǵashqy qadamymyz ekenin eskersek, altynshy oryn jaqsy nátıje dep esepteımin. Árbir oıynshynshyǵa, bapkerlik quramǵa, klýb basshylyǵyna qajyrly eńbek, jarqyn sátter úshin alǵysymdy bildiremin! Kelesi maýsymda tabys tileımin», – dedi oblys ákimi.

Pikirler
Uqsas jańalyqtar