Bul kúnderi álemde jalpyjahandyq joıqyn jańǵyrýlar bolyp jatqany jasyryn emes. Shyntýaıtynda, Úshinshi Dúnıejúzilik soǵys júrip jatyr dese de bolady. Ýkraına aspanyn ydyraý men ymyrasyz quldyqtyń qara bulty torlap tur. Júz myńdaǵan bosqyndar úmitsizdikten Reseıdi tastaı qashyp, shartarapqa shashyrap, údere kóshýde. Álemdik tártip pen halyqaralyq teńgerim túbegeıli ózgeriske ushyraýda. Jer-jahan muzdaı qursanyp, jappaı qarýlanýdan jarys júrip jatqan jaıy bar. Kúni keshegi úırenshikti úılesimderimiz ben qalaýly qundylyqtarymyz qatygez synaqtardyń qursaýynda qaldy. Teledıdarlardyń kógildir aınalary men kompıýterlerdiń móldir monıtorlary kúnnen kúnge túnere túsip, órtke oranǵan ushaqtar men tank qańqalaryn, tas-talqany shyqqan úı-jaılar men ǵımarattardyń úıindilerin, ajal qushqan ýkraın jáne reseı jaýyngerlerin kórsetýde. Álbette, bul búgingi álemniń eshbir ásireleýsiz bet-beınesi.
Tap qazir Qazaqstan da asa kúrdeli tańdaýdyń aldynda tur. Tarazy basynda, búgingi ýaqyt talqysynyń ýysynda bizdiń balalarymyz ben nemerelerimizdiń bolashaǵy bar. Elimizdiń erteńiniń de aldaǵy prezıdent saılaýynda kimdi tańdaýymyzben tikeleı baılanysty ekeni anyq. Bılik basyna tanaýynan áridegige tanymy jetpeıtin myń qubylǵan sýmaqaılar men alaıaqtar, qyzyl sózdi qymyzdaı sapyrǵan sózýarlar men jelbýaz dilmarlar kelse, bar halqymyz úshin strategııalyq úlken utylysqa uryný, barsha qazaq pen búkil qazaqstandyqtardyń birjola jeńilis tabýy bolmaq.
Bul jaǵdaıdy bizdiń «Azamat – Azamattyq bastama» qoǵamdyq birlestigi jaqsy túsinip, bolashaqty aqylmen baǵamdap otyr.
Sondyqtan da aldaǵy prezıdent saılaýynyń qarsańynda biz Qasym – Jomart Kemeluly Toqaevqa qoldaý bildiremiz. Onyń orasan zor tájirıbesin bilip, tulǵalyq tereńdigin tanyǵandyqtan da osyndaı sheshimge toqtadyq.
Qasym – Jomart Kemeluly Toqaev – alty til meńgergen maıtalman, tamasha dıplomat. Ol buryn Birikken Ulttar Uıymy Bas hatshysynyń orynbasary laýazymynda bolǵan biregeı jady men enıklopedııalyq bilimniń ıesi ǵana emes, qarapaıym halyqtyń shyn janashyry, El múddesi úshin eńbek sińirip júrgen eren saıasatker.
Ol – beımaza shaqta Qazaqstan memlekettiginiń kemesin týlaǵan teńizderdiń beıbereket tolqyndarynan jaıly aǵystarǵa alyp shyǵýǵa qarymy men qaýqary jetetin, jaımashýaq jaǵalaýlarǵa bastaýǵa qabiletti qaıratker.
«Azamat – Azamattyq bastama» qoǵamdyq birlestigi óz úmitkeri Qasym – Jomart Kemeluly Toqaevqa barynsha qoldaý kórsetip, onyń Eldegi saıası reformalardy iske asyryp, jemqorlyqpen kúres júrgizýine jáne kópvektorly syrtqy saıasat baǵytyn ary qaraı damytýyna kúsh qosýǵa daıar.
Ekinshi Dúnıejúzilik soǵystan keıin bolyp kórmegen, endi ǵana tarıh sahnasyna shyǵyp turǵan qazirgi almaǵaıyptar kezeńinde Qazaqstan halqy úshin syrtqy saıasatta durys tańdaý jasap, alys hám jaqyn kórshilerimizben strategııalyq seriktestik pen yntymaqtastyq baılanystardyń altyn kópirlerin qalyptastyrýǵa umtylý asa mańyzdy ekeni daý týdyra qoımas. Biz syrtqy saıasattaǵy osynaý dúdámal dúrbeleńderden meılinshe az shyǵynmen, múmkindiginshe mol tabyspen shyǵýǵa tyrysyp baǵýymyz kerek. Jaratýshy Iemiz alqalap, álemdik saıası ahýaldyń ózi Qazaqstannyń postkeńestik keńistikte dárgeıli dáýletke aınalyp, gúldengen de damyǵan memleket bolýyna sırek múmkindikti usynyp turǵandaı. Biz bolsaq, Qazaqstannyń memlekettigin nyǵaıtyp, Eldi kúsheıte túsý Qasym – Jomart Kemeluly Toqaevtyń qolynan keletinine esh kúmán keltirmeımiz jáne sarabdal saıasattyń sardaryna úlken senim artamyz.
«Azamat – Azamattyq bastama» qoǵamdyq birlestiginiń atynan jáne amanattaýy boıynsha
Birlestik Tóraǵasy Serik Maleev
Qazaqstan Respýblıkasynyń Halyq ártisi Tuńǵyshbaı Jamanqulov
Kınorejısser Talǵat Jánibekov
Kásipker Vıktor Dolgalev.
