Búgin, 29 qyrkúıek kúni Jezqazǵan qalasynda «Jańa saıası dáýir: ashyqtyq, ádildik jáne ózara senim» atty «Sarap» eksperttik klýbynyń aımaqtyq otyrysy ótti. Sharany uıymdastyrýshy – QR Aqparat jáne qoǵamdyq damý mınıstrliginiń qoldaýymen «Qazaqstandyq qoǵamdyq damý ınstıtýty» KeAQ.
Jıynǵa Ulytaý oblysy ákiminiń orynbasary Ǵalymjan Qusmanǵalı, Ulytaý oblysy qoǵamdyq damý basqarmasynyń basshysy Mereke Myrzabekova, «Ó.A. Baıqońyrov atyndaǵy Jezqazǵan ýnıversıteti» AQ Prezıdent-Rektory Ábdilmálik Tákishev, «Jezqazǵan Bıznes jáne kólik kolledji» JMM dırektory, Jezqazǵan qalalyq máslıhatanyń depýtaty Svetlana Jýmkına, Jezqazǵan qalasy Bıznes jáne kólik kolledjiniń oqytýshysy, tarıhshy Mashıkar Dısekenova, «Joshy han» tarıhı-mádenı kesheniniń mamany, QR Jazýshylar Odaǵynyń múshesi Ǵazız Eshtanaev, memlekettik organdardyń ókilderi, saıasattanýshylar, qoǵam qaıratkerleri, Jezqazǵan qalasynyń belsendi jastary jáne QQDI sarapshylary qatysty.
Jıynda Prezıdent Joldaýynyń negizgi erejeleri, jańa saıası dáýirdi aıqyndaıtyn bastamalary talqylandy. Sondaı-aq is-shara qatysýshylary reformalardy taldap, Joldaýdy sapaly júzege asyrýdyń túrli aspektileri boıynsha pikir almasty.
Is-shara Qazaqstandyq qoǵamdyq damý ınstıtýtynyń sarapshysy Oljas Beısenbaevtyń moderatorlyǵymen ótti. Ol Qazaqstanda Prezıdenttiń kezekten tys saılaýy 20 qarashada ótetinin eske saldy.
Otyrysty Ulytaý oblysy ákiminiń orynbasary Ǵalymjan Qusmanǵalı ashty.
«Prezıdent Joldaýynda barlyq mańyzdy saıası máseleler aıtyldy. Halyqtan kelip túsken barlyq usynystar zerdelendi jáne eskerildi. Memleket basshysynyń uzaq merzimdi, strategııalyq bastamalary men reformalary árbir qazaqstandyqtyń qatysýyn talap etedi, óıtkeni azamattardyń erik bildirýi Joldaýdyń tıimdi iske asyrylýyna kepil bolady», - dedi ákim orynbasary.
Jezqazǵan ýnıversıtetiniń oqytýshy-professorlar qaýymy men bilim alýshy jastary Prezıdent joldaýyn yjdaǵatpen tyńdap, onda aıtylǵan saıası reformalardyń jańa baǵdarlamasyn biraýyzdan qoldady. Bul týraly Ó.A. Baıqońyrov atyndaǵy Jezqazǵan ýnıversıtetiniń Prezıdent-Rektory Ábdilmálik Tákishev málimdedi:
«Joldaýda Qazaqstan azamattarynyń ómir súrý deńgeıin arttyrýǵa baǵyttalǵan negizgi mindetter atap ótildi. Bilim berý sapasyn arttyrýǵa da erekshe kóńil bólinedi. Bilim berý granttaryn, oqýǵa jeńildetilgen nesıe bólý josparlanýda. Bul sharalar joǵary bilimdi meılinshe qoljetimdi etedi, sondaı-aq qoǵamdaǵy seriktestik pen ózara jaýapkershilik ıdeologııasyn nyǵaıtady. JezÝ ujymy Memleket basshysynyń Joldaýynda aıtylǵan jańa saıası reformalardy júzege asyrýǵa belsendi qatysýǵa daıyn».
«Halyq pen bıliktiń arasyn jaqyndastyratyn osyndaı alańdardy kóbeıtý kerek. Memleket basshysynyń halyqqa jaqyn bolýǵa nıetin bildiretin bastamalaryn, qadamdaryn baıqap júrmiz. Sol bastamalardy júzege asyrý úshin úlken kúsh, biregeılik kerek. Biz osy Prezıdent reformalaryn qoldaýǵa daıynbyz», - dedi «Joshy han» tarıhı-mádenı kesheniniń mamany, QR Jazýshylar Odaǵynyń múshesi Ǵazız Eshtanaev.
QQDI sarapshysy Oljas Beısenbaevtyń pikirinshe, saılaýdy aldyn ala, Jarlyqqa qol qoıǵanǵa deıin bir aı buryn jarııalaýy, Memleket basshysy bılik tek qoǵamdyq saıasatty ǵana emes, sonymen birge «halyq únine qulaq asatyn memleket» tujyrymdamasyn júzege asyratynyn kórsetti:
«Biz muny bılik pen qoǵamdy jaqyndastyrýǵa baǵyttalǵan taǵy bir qadam retinde qabyldaımyz. Osy arqyly ózara senimdi qarym-qatynas qalyptasady. Jyl basynan beri bılik ekonomıkanyń ár salasynda olıgopolııa, áleýmettik teńsizdik ornaǵanyn da ashyq aıtyp keledi. Sonymen qosa ashyq aıtylyp qana qoımaı, ony talqylaýdyń qoǵamdyq keńes, Ulttyq Quryltaı túrindegi mehanızmderi usynylyp, Prezıdent Joldaýynda birqatar ózekti máselelerdiń sheshý joldary kórinis tapty. Bıylǵy jaz aılarynda QQDI ótkizgen eksperttik saýalnamada mamandar áleýmettik-ekonomıkalyq bloktyń qoǵamdyq dıskýrsta ózekti ekenin eskergen edi».
Moderatordyń pikirimen Qazaqstandyq qoǵamdyq damý ınstıtýtynyń sarapshysy, saıasattanýshy Baýyrjan Serikbaev ta kelisti.
«23 qyrkúıekte Qazaqstanda prezıdenttikke kandıdattardy usyný bastaldy. Respýblıkalyq qoǵamdyq birlestikter men saıası partııalardyń kandıdattar usynýǵa jáne olardyń úgit-nasıhat jumystaryn júrgizýge áli de ýaqyty jetkilikti», - dedi saıasattanýshy.
Sondaı-aq Qazaqstanda saıası reformalardy kezeń-kezeńimen iske asyratyn pragmatıkalyq joldyń negizi qalanǵandyǵyn jáne osy jolda bastysy – memlekettilikti kúsheıtip, táýelsizdigimizdi nyǵaıtyp, geosaıası kúrdeli kezeńde elimizdi jańa saıası, ekonomıkalyq, áleýmettik damý satysyna kóterý ekendigin atap ótti.
"Adyrna" ulttyq portaly
