Jumyssyz jastardyń qatysýymen semınar-trenıng ótti

1693
Adyrna.kz Telegram

Almatyda "Jastardy áleýmettendirý jáne ońaltý" jobasynyń aıasynda belgili kásipker Syrymbek Taýdyń qatysýymen semınar-trenıng ótti. 

Is-sharaǵa 160-qa jýyq jastar qatysyp, jańa bilim ıgerdi.

"Adyrna" qoǵamdyq qory joba aıasynda jastarǵa jyldyq tabysy 5 mln dollardy quraıtyn, qazirgi tańda Yokohama jáne Triangle shınalarynyń dıstrıbıýtory - Daco motors KZ kompanııasynyń, SamgaPress baspasynyń ıesi, tanymal kásipker, saıahatshy - Syrymbek Taýmen kezdesýge múmkindik syılady.

Syrymbek myrza semınarda kásip bastaýdyń qyr-cyrlarymen bólisip, negizgi qajetti tyń aqparattardy aıtyp, jas býynǵa motıvaııa berdi.

"Jetistikke jetemin degen jannyń álbette ekonomıkadan habary, qarajat jaǵynan bilimi bolýy qajet. Kim bolsa da, áýeli óziniń jeke shyǵyndaryn saraptap, retke keltire alǵan bolsa bolashaqta úlken kompanııanyń shyǵyndaryn da basqara alatyn boldy. Ózgeristi ózińnen bastaǵan abzal. Bilim al, sportpen shuǵyldan, damýshy orta tap. Sonda ǵana, óziń de ózgeresiń, seniń jasaǵan is-áreketteriń de ózgeredi. Máselen, qarajatty únemdeı almaý da saýatsyzdyqtyń bir belgisi. Mundaı jaǵdaıda eki ádisti qoldanǵan abzal. Biri - shyǵyndardy únemi jazyp otyrý. Adam kózimen aqsha jumsaǵanyn uǵynǵan saıyn, bul nársege sene bastaıdy. Ekinshisi - "jegendeı boldym" qaǵıdasy. Iaǵnı, kofe ishkińiz kelip ketse, kofehananyń janynan ótip bara jatyp, ishteı "ishkendeı boldym" deý adamdy sendiredi. Solaı nápsini syndyrý arqyly, qaltadaǵy qarajatty basqarýǵa bolady" dedi ol jastarǵa aıtqan baıandamasynda.

Budan bólek trenıng barysynda kópshilik kásipkerge túrli suraqtar qoıyp, kókeılerin mazalaǵan suraqtarǵa jaýap ala aldy.

"Sen janbasań lapyldap, men janbasam lapyldap, ol janbasa lapyldap, aspan qalaı ashylmaq" degendeı, bolashaq myna sizderdiń, jastardyń qolynda. Búgingi semınardan birińiz bolsyn túıer dúnıe alyp ketip, jetistikke jetken bolsańyz bul bizdiń úlken eńbegimizdiń nátıjesi dep bilemiz. Qashan damımyn, janamyn, jetilemin degen jastarǵa qoldaý kórsetýge daıynbyz" dedi "Adyrna" qoǵamdyq qorynyń prezıdenti Arman Áýbákir.

Is-shara QR Aqparat jáne qoǵamdyq damý mınıstrligi men «Azamattyq bastamalardy qoldaý ortalyǵynyń» qoldaýymen «Adyrna» UEB» QQ «Jastardy áleýmettendirý jáne ońaltý» jobasy aıasynda ótti.

Pikirler