Memleket basyshysy Qasym-Jomart Toqaev óziniń halyqqa Joldaýynda: «Biz 2025 jylǵa deıin 800 myń balanyń zamanaýı mektepte oqýyna jaǵdaı jasaımyz»,-degen bolatyn.
Joldaýdaǵy bul jarqyn bastama respýblıkadaǵy talaı bilim ordalarynyń kelbetiniń jańaryp, apatty jáne úsh aýysymda oqıtyn mektepterdiń sanynyń azaıýyna yqpal eteri anyq.
Alyp shahar Almatyda da dál osy másele óz sheshimin tappaq. Aldaǵy ýaqytta, naqylap aıtqanda, 2025 jyldyń sońyna deıin qalada 71 mektep salý josparlanyp otyr, onyń ishinde 23 mektep pen japsarjaı bıýdjet esebinen, qalǵandary jeke qarajat esebinen boı kóteredi.
Al 16 mektep pen japsarjaı qurylys salýshylarmen jasasqan memorandým aıasynda bolmaq. Bul «Almatyny 2025 jylǵa deıin damytý baǵdarlamasy jáne 2030 jylǵa deıingi negizgi basymdyqtarynda» jazylǵan.
Alataý, Bostandyq, Naýryzbaı jáne Túrksib aýdandarynda 2025 jyldyń sońyna deıin qosymsha bilim berýdi damytý boıynsha 4 zamanaýı ortalyq qurylady.
Aıta keteıik, Prezıdent buǵan deıin «árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis»,-dep qadap aıtqan edi. Keler urpaqtyń sapaly bilim aýly úshin «Jaıly mektep» ulttyq jobasynyń aıasynda birshama aýqymdy ister atqarylmaq.
Búginde el aýmaǵynda dál osy isterdiń tóńiregindegi máseleler oń sheshimin taýyp bastady.
Jalpy joldaýda aıtylǵandaı, mektep salý Úkimet jáne ákimdikter úshin basty mindettiń biri bolýy kerek. Jemqorlar sottalǵanda, olardyń zańsyz tapqan qarjysy memleketke ótip, túgeldeı mektep qurylysyna jumsalýǵa tıis. Ol úshin Úkimet osy bastamany zań turǵysynan rásimdeý týraly sheshim qabyldaýy ǵana qaldy .
