AQSh Kongresi Ókilder palatasynyń spıkeri Nensı Pelosı jumys saparymen Erevanǵa ushyp kelmek. Kongressmenderdiń kelýine daıyndalyp jatqan armıandar Reseı dıktatory Vladımır Pýtın beınelengen alyp bannerdi alyp tastady. Bul týraly Ýkraına Joǵarǵy Radasynyń depýtaty Alekseı Goncharenko Telegram arnasyna jarııalady, dep habarlaıdy “Adyrna” ulttyq portaly.
Erevan áýejaıynda Pýtınniń sýreti men «Máńgi birge» degen jazýy bar úlken banner ornalastyrylǵan bolatyn. Ol jerde banner bir-eki jyl ilýli turdy. Endi alynyp tastaldy.
Goncharenko banner Pelosıdiń saparyna emes, Reseıdiń Armenııaǵa satqyndyǵyna baılanysty alynyp tastaldy degen pikir bildirdi. Óıtkeni, Máskeý Ázirbaıjanmen soǵysta Erevanǵa kómektesýden bas tartqan edi.
«Bir-eki jylda eki ret opasyzdyq jasaǵan odaqtastyń fotosy nege kerek?» – dedi ol.
Aıta keteıik, Pelosı Armenııa men Ázirbaıjan arasyndaǵy qarym-qatynastyń shıelenisýi aıasynda Erevanǵa barady. 13 qyrkúıekke qaraǵan túni eki eldiń shekarasynda qaqtyǵys bolyp, nátıjesinde 135 armıan men 71 ázirbaıjan qaza tapty. Erevan Bakýdi agressııa jasady dep aıyptap, NATO-nyń reseılik analogy UQShU-dan áskerı kómek surady. Alaıda oǵan kómektesýge bas tartty.
Pelosıdiń Armenııaǵa sapary Máskeý mańyzdy odaqtasynan aıyrylýy múmkin degen belgini bildirmek.
Buǵan deıin Dialog.UA reseılik BAQ áskerı kómekten bas tartqannan keıin Armenııanyń Pýtınniń UQShU uıymynan shyǵatynyn jarııalap jatqanyn habarlady.
Qazaqstan Pýtınge UQShU-dan shyǵý túrinde soqqy daıyndap jatqanyn da jazǵanbyz.
”Adyrna” ulttyq portaly
