«AMANAT» partııasynyń Atqarýshy hatshysy Ashat Oralov «Jer amanaty» komıssııasynyń múshelerimen birge Qaraǵandy oblysynyń turǵyndarymen kezdesip, jaıylymdyq jerdiń jetispeýshiligine qatysty ózekti máseleni talqylady.
Kezdesý barysynda aýyl turǵyndary men sharýa qojalyqtarynyń basshylary jerdiń qunarsyzdanýy, qudyq tapshylyǵy, sýbsıdııanyń tómen deńgeıi, dızel otynynyń baǵasy jáne taǵy basqa máselelerdi kóterdi.
«AMANAT»-tyń Atqarýshy hatshysy quramyna partııanyń depýtattary, Bas prokýratýranyń, Aýyl sharýashylyǵy mınıstrliginiń ókilderi, zańgerler, qoǵam qaıratkerleri kiretin komıssııa músheleri aýyl turǵyndarynyń máselelerin bilý úshin elimizdiń barlyq óńirinde kezdesýler ótkizip jatqanyn atap ótti.
«Memleket basshysy Qasym-Jomart Toqaevtyń tapsyrmasy boıynsha, paıdalanylmaı jatqan jáne jeke menshikke zańsyz berilgen aýyl sharýashylyǵy jerlerin memleket menshigine qaıtarý jóninde jumys júrgizilýde. «Jer amanaty» komıssııasynyń mindeti – aýyl turǵyndary úshin jaıylymǵa teń qoljetimdilikti qamtamasyz etý. Úsh aıdyń ishinde «AMANAT» partııasynyń aralasýymen 10 óńirde 1,6 mln gektardan astam jer qaıtaryldy. Onyń ishinde Qaraǵandy oblysynda 1 mln gektar jaıylym memleket menshigine ótti. Biz bul isti toqtatpaımyz. Osy baǵyttaǵy turaqty jumysty jalǵastyramyz», – dedi Ashat Oralov.
Májilistegi «AMANAT» partııasynyń depýtaty Erlan Saırov jaıylym tapshylyǵy jer salasyndaǵy jalǵyz másele emes ekenin atap ótti.
«Aýyl turǵyndary men sharýalar jer paıdalaný quqyǵyna, jer paılaryn bólýge qatysty birqatar másele kóterýde. Kezdesýler qorytyndysy boıynsha zańnamaǵa tıisti ózgerister engiziledi», – dedi ol.
Jergilikti turǵyn Nurbol Arynbaevtyń aıtýynsha, aýyl turǵyndary «Jer amanaty» komıssııasyna úlken úmit artady. «Mal sany ósip jatyr. Al jem-shóp bazasy jetispeıdi. Ásirese shaǵyn sharýashylyqtarǵa qıyn. Jańa jaıylymdar, memleket tarapynan qoljetimdi sýbsıdııalar qajet», – dep atap ótti ol.
Sharýa Eldos Maılybaev aýdan turǵyndarynyń basym bóligi et jáne sút sharýashylyǵymen aınalysatynyn atap ótti.
«Jaıylym tapshylyǵy ár aýylda seziledi. Komıssııa jumysynyń osy oblystaǵy naqty nátıjesin kórip otyrmyz. Bul – qýanarlyq jaǵdaı. Partııalyqtarmen kezdesýde ózge de túıtkildi máselelerdi atap óttik. Ol máseleler de óz sheshimin tabýy tıis», – dedi ol.
Belgili zańger Baqytjan Bazarbek komıssııa músheleri jaıylymdardyń ádil bólinýine qol jetkizýdi jalǵastyratynyn atap ótti.
«Ókinishke qaraı, jergilikti turǵyndar barlyq jaıylymnan shettetildi. Aýyl turǵyndary mundaı komıssııany kútip otyrǵanyn kórip otyrmyz. Bárin tekserip, qazirde keıbir olıgarhtardyń jerin memleketke qaıtaryp jatyrmyz. Taǵy da qaıtalap aıtamyn: zań aldynda bári teń», – dedi ol.
Sol kúni partııanyń Qaraǵandy oblystyq fılıalynda «Jer amanaty» komıssııasynyń músheleri azamattardy qabyldady.
Aıta ketý kerek, jer máselelerin neǵurlym jedel sheshý úshin qazaqstandyqtar barlyq zań buzý faktileri týraly «AMANAT» partııasynyń «Jedel jeli» 8 800 080 44 41 telefonyna habarlaı alady. Ótinimder WhatsApp arqyly da +7 700 800 44 41 nómir boıynsha qabyldanady. «Jedel jelige» 1,5 myńnan astam ótinish kelip tústi. Onyń barlyǵy óńirlik komıssııalardyń qaraýyna berildi.
