Elımızde Toqaevty qoldaityn jalpyrespublikalyq qoǧamdyq qozǧalys qūryldy

1780
Adyrna.kz Telegram
https://adyrna.kz/content/uploads/2022/09/2b72aafc-74b4-4dca-86a9-a9d17731aeeb.jpeg
Bügın Almaty qalasynda «Toqaevtyŋ reformalary üşın» jaŋa qozǧalysynyŋ baspasöz konferensiiasy öttı. Qoǧamdyq qozǧalysty qūru jönındegı bastamay belgılı qoǧam jäne saiasi qairatkerler, ǧylymi jäne şyǧarmaşylyq ziialy qauym men biznes-qoǧamdastyq ökılderı, mädeniet jäne sport qairatkerlerı, sondai-aq qoǧamdyq ūiymdardyŋ köşbasşylary köterdı. Olardyŋ qatarynda Mereke Qūlkenov, Raiymbek Batalov, Aqberen Elgezek, Sergei Ponomarev, Beknūr Qisyqov, Däuren Quat, Däuletkerei Käpūly, Ädıl Ahmetov, Nazgül Qarabalina, Marat Şibūtov jäne t.b. bar. Bırlestık qūrudyŋ basty ideiasy Memleket basşysynyŋ reformalaryn qoǧamdyq qoldau men olardy ıske asyruǧa qajettı jaǧdai jasau.
«Jalpy, 2019 jyly bastalǧan Prezident reformalary kezeŋ-kezeŋımen jüzege asyp keledı. «Qaiǧyly qaŋtar oqiǧasynan» keiın qoǧamdy demokratiialandyru men liberaldandyru prosessterı qarqyndy jürude. Sondyqtan bız azamattyq qoǧam osy özgerısterdıŋ bel ortasyna tabyluy qajet dep sanaimyz. Bızdıŋ qozǧalys ügıt-nasihat üşın emes, prosesterge qatysu üşın qūrylǧan. Bız qazır reformalardy qoldap, osy maŋyzdy kezeŋdı soŋyna deiın jetkızuımız kerek», - dep atap öttı Qazaqstan Jazuşylar Odaǧy töraǧasynyŋ bırınşı orynbasary, aqyn Aqberen Elgezek.
Qozǧalysty qūruşylar partiialyq doda alaŋyn liberaldandyryp, memlekettık apparattyŋ kadrlyq qūramyn jetıldıruge jäne t.b. baǧyttalǧan saiasi jaŋǧyru – demokratiialyq prosesterdı jandandyryp, azamattyq qoǧamdy dūrys baǧytta saiasilandyrdy dedı.
«Qazaqstanda qazır saiasi partiialardy qūrǧan jäne qūruǧa daiyn, tırkelu üstındegı, sailau nauqandaryna qatysu jospary bar, bilık üşın küresu ısıne şyndap kırısıp jürgen adamdar men bırlestıkter paida boluda. Prezident bügınde barlyq partiialardan özın şettedı. Sondyqtan reformalardy qoldauǧa arnalǧan qoǧamdyq qozǧalys qūru ısın bız reformalarǧa qatysu üşın neǧūrlym tiımdı ärı yŋǧaily ūiym dep sanadyq. Bızdıŋ qatarymyzǧa niet bıldırgen barlyq azamat qosyla alady. Qazaqstandaǧy özgerısterdı jaqtaityn adamdar sany basym bolady dep senemız», - dedı bastamaşyl top ökılderı.
Qozǧalys müşelerı ärbır qazaqstandyqtyŋ reformalardyŋ oidaǧydai ıske asuyna müddelı ekenın, sebebı onyŋ ärbır kezeŋın ıske asyrǧan saiyn qarapaiym el azamattarynyŋ äl-auqaty men ömır süru deŋgeiı köterıle tüsetının atap öttı. «Künı keşegı Joldauda Prezident öskeleŋ ūrpaqty qoldauǧa baǧyttalǧan äleumettık-ekonomikalyq sipattaǧy bırqatar şaralardy jariialady. Atap aitqanda, bala tuǧanda tölenetın järdemaqy merzımın ūzartu, Ūlttyq qor tabysynyŋ bır bölıgın barşy qazaqstandyq balalardyŋ igılıgıne jūmsau, «Samūryq-Qazynanyŋ» taza tabysynyŋ 7%-yn «Qazaqstan halqy» Qoryna audaru jäne t.b. Būl qanşama jyldan berı elımızdıŋ ärbır azamaty endı ǧana naqty sezıngen keleşek ūrpaq igılıgıne arnalǧan investisiia. Būl bastamanyŋ alǧaşynda halyq arasynda bıraz äbıger tudyrǧany belgılı. Osynyŋ negızınde halyq qazır osy bastamalardyŋ barlyǧynyŋ naqty ıske asqanyn qalaidy. Sondyqtan bız osylardy aiaǧyna deiın jetkızu üşın Memleket basşysyna mümkındık berıp, jan-jaqty qoldau körsetetın bolamyz», - dep atap öttı qozǧalysqa qatysuşylar.
Pıkırler