"Bekbolat Tileýhan Muhamedjan Tazabektiń aıtqanyn eki etpeıdi, onyń qoǵam aldyndaǵy basty qateligi de osy". Bul pikirdi jýrnalıst Toqtar Jaqash óziniń feısbýk paraqshasynda qaldyrdy, dep jazady "Adyrna" ulttyq portaly.
"Áńgime, taǵy da Beka men Muha haqynda. Osy eki adamnyń azamattyq, adamshylyq qasıetterin, obrazyn ashyp jazǵym kelgen. Óıtkeni, kópshiligimiz olarmen jaqyn aralasqan joqpyz. Dúrmekke ilesip ne qatty jaqsy kóremiz, ne qatty jek kóremiz. Biz keıde basqa adam jasaǵan kemshilikti kóp keshire de almaımyz. Sonyń biri ózim ekem. Bizdiń basty kemshiligimiz de sol shyǵar. Bekbolat pen Muhamedjandy birneshe jyldan beri synap-minep kele jatyrmyn. Biraq máseleniń ekinshi jaǵy taǵy bar. Al endi sol nársege týrasyna kósheıik: Bekbolat pen Muhamedjanmen alys-jaqyn bir jylǵa jýyq aralastym. Sol az ýaqyt jaqyn aralasqanda tanyǵanym: Bekbolat shyǵarmashylyqtyń adamy bolǵasyn ba, álde, Jańaarqa sııaqty dalanyń qazaǵy bolǵasyn ba, qyzba, shyrt etpe jáne sonysymen qosa ańqyldaǵan aqkóńil azamat. Tilshilerge suqbat bergende sol ańǵaldyǵymen sózden ustalyp, kúlki bop jatady. Áıtpese, elde júrgende kómek surap barǵan jannnyń qolyn qaıtarǵanyn kórmeppin. Depýtat bolyp júrgende kópbalaly birneshe áıelge aı saıyn jalaqysynan bólip aqsha jiberip turdy. Onysyn basqalar sııaqty jarnamalap, dabyra qylǵan joq. Ún-túnsiz, óziniń 15 balasymen qosyp, tanymaıtyn bireýlerdiń shıetteı bala-shaǵasyn baqty. Ózi aıtpaqshy, Nazarbaev rejıminde talaı ret taıaq ta jedi. Baıaǵyda premer-mınıstr bop turǵan Másimovke "qazaqsha sóıleńiz" degeni úshin depýtattyq mandattan aıyrylyp, birneshe jyl qońyz da terip kete jazdady. Ol kezde júıe sondaı bolatyn. Qarsy kelgendi qylǵyndyryp, kónbegendi kómip tastap otyrdy. Árıne, bul aqtaýǵa bolatyn sebep emes. Degenmen, adamnyń sol ýaqyttaǵy bolmysyn, minez-qulqyn túsindiretin fakt. Al Muhamedjan bolsa, bilimi asa tereń emes, bireýge jaqsylyq jasaýdan buryn "odan keıin qandaı paıda bar?" dep on ólshep, júz tolǵanatyn, árbir áreketin tek baqaı esepke quratyn aılaker azamat. Muhamedjannyń is-áreketin saraptaǵanda meniń kóz aldyma Gaı Iýlıı ezardyń Kassı degen keńesshisi elestep turady. Naǵyz ıdeologııa salasynda jumys isteıtin adam. Nege ekenin bilmeımin, biraq Bekbolat Muhamedjannyń aıtqanyn eki etpeıdi. Taq turady. Bekbolattyń qoǵam aldyndaǵy basty qateligi de osynda sııaqty", - dep jazdy jýrnalıst.
"Adyrna" ulttyq portaly
