«AMANAT» partııasynyń «Jastar Rýhy» jastar qanaty jasaqtaǵan volonterlik toptar Qostanaı oblysynda orman órtinen zardap shekken jáne evakýaııalanǵan turǵyndarǵa kómek kórsetip, belsendi jumysyn jalǵastyryp jatyr.
«AMANAT» partııasy «Jastar Rýhy» jastar qanatynyń tóraǵasy Nurjan Jetpisbaev atap ótkendeı, Áýlıekól aýdanyna elimizdiń túkpir-túkpirinen 300-den astam erikti keldi.
«Volonterlerimiz gýmanıtarlyq kómekti qoımalarǵa jaıǵastyrdy. Azyq-túlik pen qajetti zattardy turǵyndardyń úılerine jetkizip berýde. Zardap shekkender men evakýaııalanǵandarǵa jyly sózimizdi aıtyp, moraldyq qoldaý kórsetý de mańyzdy. Bul – bizdiń shynaıy janashyrlyǵymyzdy bildirý ǵana emes, sonymen birge olarǵa qıyn sátte kúsh-jiger berý. Sonymen qatar, jastar qalpyna keltirý jumystaryna, órtten keıingi úıindilerdi suryptaýǵa, aýmaqty tazalaýǵa jumyldyrylǵan. Munymen qosa, biz órtten zardap shekpegen, biraq qoldaýdy qajet etetin kópbalaly jáne az qamtylǵan otbasylarǵa da azyq-túlik taratamyz», - dedi N.Jetpisbaev.
Sondaı-aq, ol qazir turmystyq tehnıka men qurylys materıaldary kóbirek kelip jatqanyn aıtty.
Volonter Raıymbek Baqytjanov Qostanaı oblysyna elordadan keldi. Ol apat týraly estı sala birden erikti retinde barýǵa sheshim qabyldaǵanyn aıtty.
«Júk tıelgen kólikter saǵat saıyn kelip jatady, uıyqtamaı, demalmaı jumys isteýge týra keledi. Biraq erikti bolýdyń basty qasıeti de osy. Sebebi biz adamdarǵa naqty ispen kómektesemiz. Sondyqtan múmkindigim bola salysymen osynda esh oılanbastan keldim. Biz munda kómek qoldaýymyz qansha qajet bolsa, sonsha ýaqytqa deıin jumys isteımiz», - dedi ol.
Jergilikti turǵyn Amanjol Ahmetov eriktilerge alǵysyn aıtyp, eń bastysy, elimizde tynyshtyq bolsyn degen tilegin jetkizdi.
«Búkil Qazaqstan halqy bizge kómektesip jatyr. Azyq-túlik tapshylyǵy joq, bizge qajettiniń bárin ákeldi. Bul órt qazaqstandyqtardyń qıyn sátte bir-birine kómektesýge ázir janashyrlyǵyn kórsetti», – dedi ol.
Eske sala keteıik, amanattyqtar úsh kún ishinde zardap shekkenderge 1214 tonna gýmanıtarlyq kómek jınady. Partııa fılıaldary janyndaǵy gýmanıtarlyq kómek jınaý pýnktteri elimizdiń barlyq 20 óńirinde jumys isteıdi. «AMANAT» partııasy Ortalyq apparatynyń ujymy da zardap shekkenderge kómek kórsetý qoryna birkúndik jalaqysyn aýdardy. Qazirgi ýaqytta volonterler partııa fılıaldary janynan ashylǵan gýmanıtarlyq kómek jınaý pýnktterinde jumysyn jalǵastyrýda.
