«QazMunaıGaz» basshysy Caspi Bitum, Atyraý zaýyttarynda munaı ónimderin óndirý jáne jóneltý boıynsha jıyn ótkizdi

2936
Adyrna.kz Telegram

«QazMunaıGaz» UK AQ (ári qaraı - QMG) Basqarma basshysy Maǵzum Myrzaǵalıev Atyraýda kóshpeli keńes ótkizdi. Onda ishki naryqty jol bıtýmymen qamtamasyz etý, Atyraý munaı óńdeý zaýytynda munaı ónimderin óndirý jáne jóneltý, zaýytty jóndeý merzimi talqylandy. Jınalasqa QazMunaıGaz, AMÓZ jáne Caspi Bitum Aqtaý bıtým zaýytynyń basshylyǵy qatysty.

«Keshe Memleket basshysy Qazaqstan halqyna Joldaýynda jol-qurylys jumystary maýsymynda ishki naryqta bıtým tapshylyǵyna qatysty ádil syn aıtty. Seriktestermen jáne múddeli memlekettik organdarmen birlesip, qalyptasqan jaǵdaıdy ózgertý boıynsha túbegeıli sharalar qabyldaý qajet», - dep atap ótti M.Myrzaǵalıev.

Jıyn barysynda aıtylǵandaı, Qazaqstanda bıtýmǵa degen suranys jaz aılarynda jol qurylysy belsendi júrgiziletin shaqta arta túsedi. Osyǵan baılanysty, M.Myrzaǵalıev «QazMunaıGazdyń» jaýapty qurylymdyq bólimshelerine ýákiletti memlekettik organdarmen jol-qurylys uıymdaryn memleket tarapynan jyl boıy qarjylandyrý (avans berý) múmkindigin talqylaýdy tapsyrdy. Bul jol-qurylys jumystary maýsymynyń bastalýyna qaraı ishki naryqta bıtýmnyń qajetti qoryn jınaqtaýǵa múmkindik beredi.

Sonymen qatar, jıynda Caspi Bitum zaýytynyń qýatyn 1,5 ese arttyrý máselesi talqylandy. Bul joǵary sapaly bıtým óndirisin jylyna 750 myń tonnaǵa deıin ulǵaıtýǵa múmkindik beredi. Caspi Bitum  keltirgen derek boıynsha, munaı óńdeý kólemin ulǵaıtýǵa múmkindik bar, onyń aldyn ala tehnıkalyq-ekonomıkalyq negizdemesi ázirlenip te qoıǵan, mamandar jobalaýǵa kirisip jatyr.

Jıyn barysynda sondaı-aq Atyraý munaı óńdeý zaýytynyń basshylyǵy kásiporynnyń turaqty jumys istep turǵanyn, óndiristik kórsetkishter ýaqtyly oryndalyp jatqanyn baıandady. Bıylǵy jyldyń  qorytyndysy boıynsha zaýytta munaı óńdeý kólemi 5 mln tonnadan aspaq. Janar-jaǵarmaı naryǵyndaǵy jaǵdaıdy turaqtandyrý úshin Atyraý munaı óńdeý zaýytynyń qyrkúıekke josparlanǵan jóndeý jumysyn keıinge aýystyrý máselesi pysyqtalyp jatyr. Bul rette M.Myrzaǵalıev zaýyt basshylyǵyna janar-jaǵarmaı naryǵyndaǵy qazirgi jaǵdaıdy eskere otyryp, zaýyttyń aǵymdaǵy jóndeý jumysyn keıinge aýystyrý boıynsha daıyndyq jumystaryn júrgizýdi tapsyrdy.

Anyqtama úshin:

Bıtým óndirý boıynsha «QazMunaıGaz» UK AQ zaýyttarynyń eń joǵary qýaty jylyna 800-850 myń tonnaǵa deıin jetedi. (Caspi Bitum – 500 myń tonna jáne Pavlodar munaı óńdeý zaýyty – 350 myń tonna).

Caspi Bitum Aqtaý zaýyty kez kelgen klımattyq jaǵdaıda uzaq ýaqyt boıy saqtalyp, paıdalanýǵa bolatyn bıg-beg dep atalatyn iri óndiristik qapshyqtarǵa ólshep salynǵan bıtýmdy óndire alady.

Pikirler