Almatylyq polıeıler jańa týǵan náresteni qutqaryp qaldy, dep habarlaıdy «Adyrna» tilshisi Polisia.kz-ke silteme jasap.
Keshe túnde qalanyń Túrksib aýdanynda jańa týǵan náresteni qutqarýǵa arnalǵan arnaıy is-shara ótti.
– Bizge túngi saǵat ekide kámeletke tolmaǵan qyzdyń túsik tastaǵandyǵy týraly qońyraý kelip tústi. Ol qaladaǵy aýrýhanalardyń birine jatqyzyldy. Dárigerlermen sóıleskennen keıin men oqıǵa ornyna baryp, tekserýdi jón kórdim. Basyma “bala qaıda?” degen suraq keldi. Qyzdyń anasynan oqıǵa bolǵanǵa deıin onyń syrttaǵy dárethanada biraz ýaqyt bolǵanyn bildim. Dárethana ishinen qan izderin taýyp, ishinde jatqan balany kórdim. Ol dem alyp jatty. Osy kezde tergeý-jedel toby keldi, onyń quramynda krımınaldyq polıııa bóliminiń jedel ýákili Ǵazız Hamasqalıev boldy. Biz dárethananyń edeninen taqtalardy tez alyp tastadyq. Áriptesim Ǵazız tómen túsip, balany qyzmettik kóılegine orap, abaılap shyǵaryp aldy. Sol kezde náreste jylady. Bárimiz mazasyz kúıde edik, ýaıymdadyq. Balany tez arada dárigerlerge tapsyrdyq, – dedi Túrksib aýdandyq PB-nyń kámeletke tolmaǵandar isi jónindegi ýchaskelik ınspektory Nurjan Shatýnov.
17 jastaǵy jasóspirimniń anasynyń aıtýynsha, ol qyzynyń júkti bolǵanyn bilmegen. Qazirgi ýaqytta bul derek boıynsha Túrksib aýdandyq PB-na qarasty polıııa bóliminde tergeý amaldaryn bastaldy. Oqıǵanyń mán-jaıy anyqtalýda.
– Qazir balanyń jaǵdaıyn bilip qaıttyq. Ol dárigerlerdiń baqylaýynda jansaqtaý bóliminde jatyr. Óz betinshe dem alyp jatyr – bul jańalyqqa balany qutqarýǵa qatysqan barlyq áriptesterim qatty qýandy. Demek bala ómir súredi. Ol týylǵannan beri óz ómiri úshin kúresti. Oǵan zor densaýlyq, uzaq ǵumyr tileımiz. Baqytty bolyp óse bersin. Men úsh uldyń ákesimin. Sondyqtan bul oqıǵa meni beı-jaı qaldyrmady. Biz óz áriptesterimizben birge qutqarylǵan náresteniń taǵdyryn mindetti túrde qadaǵalaımyz jáne múmkindiginshe oǵan qatysatyn bolamyz, – dedi Shatýnov.
