Qazaqstan musylmandary dinı basqarmasy mekteptegi qyzdardyń oramal taǵý máselesine qatysty óz ustanymyn bildirdi, dep habarlaıdy Ult aqparat.
"QMDB jamaǵat tarapynan kıim máselesine qatysty joldanǵan suraqtarǵa sharıǵat boıynsha, balıǵat jasyna tolǵan musylman qyzǵa oramal taǵý mindet ekenin málimdeıdi. Qazaqstan musylmandary dinı basqarmasy elimizdegi musylman qyz-kelinshekter men áıelderdi kıim kııý úlgisinde qazaq halqynyń salt-dástúrlerin saqtaı otyryp, jınaqy kıinýge keńes beredi. Al paranja (nıqab) kııýdiń saltymyzda bolmaǵan, basqa eldiń úlgisi ekenin de erekshe atap ótkenimiz jón.
Islam sharıǵatynda qyz balanyń balıǵatqa tolýyn 9 jaspen shekteý durys emes. Musylman ǵalymdary qyz balalardyń fızıologııalyq erekshelikterine saı, kópshiliktiń jaǵdaıyn nazarǵa ala otyryp, 15 jaspen shektegen.
Islam dini balıǵat jasyna tolmaǵan, sanasy tolyq qalyptasyp úlgermegen, oramal taǵýdyń túpki máni men mańyzyn, úkimin túsinbeıtin kishkentaı qyz balasyna oramal taǵýdy mindettemeıdi. Árbir musylman qyz bala oramaldyń qadir-qasıetin tereń túsinip, jaýapkershiligin sanaly túrde sezinip, Allanyń ámirin óz erkimen oryndaýy basty maqsat. Mektep tabaldyryǵyn endi ǵana attaǵan búldirshindi jaýlyq jabýǵa májbúrleýden buryn oǵan eń áýeli bilim men tárbıe bergen abzal. Bul – ata-ananyń basty mindeti.
Alla Taǵala kúlli adamzat balasyna ımandy bolýdy ári bilim alýdy ámir etken. Quran Kárimniń eń alǵash túsken aıatynyń ózi «Oqy!», degen buıryqpen bastalýy erekshe nazar aýdararlyq.
Sondaı-aq Quranda: «Rabbym, bilimimdi arttyr!», («Taha» súresi, 114), «Biletinder men bilmeıtinder birdeı bola ma?» («Zýmar» súresi, 9), «Alla Taǵala senderdiń aralaryńda ıman keltirgender men boılaryna bilim darytqandardyń dárejelerin ósiredi» («Mýjádálá» súresi, 11) dep ilim ıeleriniń mártebesiniń joǵarylyǵyn atap ótken.
Ardaqty Paıǵambarymyz (Allanyń salaýaty men sálemi bolǵaı): «Bilim alý árbir musylman er kisige de, áıelge de paryz»,– dep bilim izdenýdiń áıelderge de tıisti ekenin aıtqan.
Sondyqtan da, dinimizde musylman er kisi men áıelge bilim alý – mindet. Al mektep jasyndaǵy balaǵa ımandylyqqa baýlyp, bilim úıretý – árbir adamnyń azamattyq ári musylmandyq boryshy. Dinı hám zaıyrly bilim alý – jarqyn bolashaqtyń kilti.
Búgingi zamannyń úderisi elimizdiń árbir azamaty men laýazymdy tulǵasyna bilimdi, ımandy, otanshyl urpaq qalyptastyrýdy talap etýde. Bul – barshamyzdyń uly boryshymyz, asyl mindetimiz.
Biz musylman jamaǵaty men ata-analardy oqý oryndarynyń mektep oqýshylarynyń kıim úlgisine qatysty qoıylatyn talaptaryna túsinistikpen jáne sabyrlyqpen qaraýǵa shaqyramyz. Bul máseleni ýshyqtyrý durys emes. Óıtkeni elimizde oramalǵa túbegeıli tyıym salynbaǵanyn túsinýimiz kerek. Tek orta mektepterde kıim úlgisin birizdilikke túsirý maqsatynda sheshim qabyldanǵan.
Konstıtýııaǵa sáıkes, elimiz zaıyrly memleket bolyp tabylady, onda azamattardyń ar-ojdan bostandyǵyna erkindik berilgen. Sonymen qatar, «Dinı qyzmet jáne dinı birlestikter týraly» Zańda dinı birlestikterdiń memlekettiń qyzmetine aralaspaıtyny kórsetilgen. Atalǵan Zańda elimizdegi bilim berý jáne tárbıeleý júıesi din men dinı birlestikterden bólingendigi jáne zaıyrly sıpatta bolatyndyǵy aıtylǵan.
Dindar azamattar qoǵamnan bólek ómir súrmeıdi. Dinimizdegi boıusyný – negizgi mindetterdiń biri. Sondyqtan musylmandar zańǵa qurmetpen qaraýy tıis.
Elimizdiń zańnamalary bizge balalarymyzdyń orta bilim alýyn qamtamasyz etýimizdi mindetteıdi. Bilimsizdik búlikke bastaıtynyn umytpaıyq. Sondyqtan qyz balanyń tolyqqandy zaıyrly bilim alýyn ata-analary elimizdiń zańnamasy talaptary sheńberinde qamtamasyz etkenderi jón.
Alla Taǵaladan elimizdi túrli búlikten saqtaýyn tileımiz. Halqymyzdyń birligi men berekesi arta bergeı!" - delingen basqarma málimdemesinde.
