Aıtysker aqyn Rınat Zaıtov Bekbolat Tileýhanǵa "sizdiki - "durys", meniki- "aǵattyq" dep, áńgimeni osy jerden doǵaratynyn habarlady. Bul týraly "Adyrna" ulttyq portaly jazady.
"Assalaýmaǵalaıkým asa qurmetti Bekbolat aǵa. Maǵan joldaǵan vıdeosálemińizdi kórdim. Tańyrqadym dep ótirik aıta almaımyn. Osylaı qabyldaıtynyńyzdy sezdim. Biraq túsindirmesin kezdeskende beremin aý dep oılaǵanmyn. Oǵan myna áleýmettik jelidegi áńgime ózimiz toqtatpaı, tyıylmaıtyn sııaqty. Sondyqtan bir sózimdi jetkizýge tyrysaıyn. Aǵa, ózińizge byltyr ǵana habarlasqandaǵy aıtqan sózim sol sóz. Men sizdi eshteńege qaramastan, aǵa dep qurmetteımin, qaıtalanbas talant - dep jaqsy kóremin! Al keıbir jaǵdaılarda tanytqan osaldyǵyńyzdy týra synasam, ol - inilik nazym, aqyndyq asaýlyǵym. Ol ókpemniń orny bar dep oılaımyn. Sebebi: qazirgi ýaqytta bizdiń elde resmı málimetter Qańtardaǵy qyrǵynǵa sizdiń dos tutyp júrgen azamattardy kúdikti tanyp, tergeý júrgizýde. Demek, eger ol málimetter ras bolsa, sizdiń dostaryńyzdyń josparlarynan habarsyz bolǵanyńyzǵa senbeımin. Al ótirik bolsa, onda qazirgi bılik bizdi aldap, aqymaq kórip, jazyqsyz adamdardyń moınyna júzdegen adamnyń qanyn artqaly tur degen sóz. Sizdiki qaısysy? Ne bolsa da, eki jaǵdaıda da eshteńe kórmegensip, úndemeı qalý sizge syn aǵa. Jaqsy. Jaýap oılap altyn ýaqytyńyzdy ketirmeńiz. Sizge birdeńe dáleldep, yryldasyp talasý oıymda joq. Óıtkeni Qazaq onsyz da jan-jaqqa toptalyp alyp, qyryq pyshaq bolyp jatyr. Endi qalmaǵany Bekbolat Tileýhan men Rınattyń jaqtastarynyń shaıqasýy ma? Qurysyn. Aıyp etpeńiz. Ondaı elge esh paıdasy joq, "ónbes ósekter" jarysyna júıkem men ýaqytymdy ketirmeımin. Bekbolat aǵa sizdiki - "durys", meniki- "aǵattyq". Siz - jaqsy, men - jaman. Osy jerden qoıdym. Siz de sóıtetin shyǵarsyz?...", - dep jazdy aıtysker aqyn óziniń ınstagram paraqshasynda.
"Adyrna" ulttyq portaly
