Qorǧanys ministrlıgı soŋǧy kezderı elımızdıŋ küştık qūrylymdarynda oryn alǧan özıne-özı qol jūmsau faktılerınıŋ jiıleuıne bailanysty mälımdeme jasady, dep habarlaidy «Adyrna» tılşısı.
Vedomstvo baǧynystylardyŋ ömırı men densaulyǧyna ŪQK Şekara qyzmetı, IIM Ūlttyq ūlany, Memlekettık küzet qyzmetı jäne Tötenşe jaǧdailar ministrlıgınıŋ de jauapty ekenın atap öttı.
«Beibıt uaqytta atalǧan küştık qūrylymdar Qaruly küşterdıŋ qūramyna kırmeidı jäne Qorǧanys ministrlıgı olardyŋ qauıpsızdıgın baqylamaidy. Özıne-özı qol jūmsau siiaqty şarasyz qadamǧa baru ol adamnyŋ tuystary men jaqyndary üşın ülken qaiǧy. Komandirlerge de jauyngerden aiyrylu auyr şyǧyn. Qaruly küşterde bolǧan ärbır jaǧdaidy äskeri polisiia qyzmetkerlerı jäne basqa da qylmystyq qudalau organdary mūqiiat tekseredı. Tekseru nätijelerı özıne-özı qol jūmsau köp jaǧdaida äskeri qyzmet ötkerumen bailanysty emes ekenın körsettı. Äskerge şaqyruǧa deiıngı kezeŋde äskeri qyzmetşılerdı osyndai äreketke itermeleitın är türlı ömırlık jaǧdailar kezdesetının eskeru kerek. Qazırgı uaqytta Qorǧanys ministrlıgınıŋ bastamasymen ǧylym, qūqyq qorǧau organdary men ükımettık emes ūiymdar ökılderınıŋ qatysuymen äskeri ortada orny tolmas şyǧyndardy barynşa azaituǧa jäne suisidtıŋ aldyn aluǧa baǧyttalǧan «Ömırdı saqta» keşendı baǧdarlamasy äzırlenıp jatyr»,– dedı ministrlık.
