Foto: Aqorda
Memleket basşysy Qasym-Jomart Toqaev memlekettık qarjynyŋ jūmsaluyn baqylaityn arnaiy komissiia qūrylatynyn mälımdedı. Būl turaly ol Qazaqstan Respublikasy Qauıpsızdık Keŋesınıŋ şūǧyl otyrysynda aitty, dep habarlaidy “Adyrna”.
Prezidenttıŋ pıkırınşe, sybailas jemqorlyqqa batqan nietı terıs kısıler qazırdıŋ özınde "Halyqtyq qūrylys" baǧdarlamasyn ıske asyruǧa ziian tigızudı oilap jür.
"Özderıŋızge mälım, qazır bız jaŋa tarihi kezeŋge qadam bastyq. Endı bır orynda tūryp qaluǧa, būrynǧy jetıstıkterdı mıse tūtyp, arqany keŋge saluǧa haqymyz joq. Ädılettı Qazaqstandy qūru ısınde jalqaulyq pen selqostyqqa boi aldyruǧa bolmaidy.
Al sybailas jemqorlyqqa batqan nietı terıs kısıler – bızdıŋ qas jauymyz. Olar qazırdıŋ özınde "Halyqtyq qūrylys" baǧdarlamasyn ıske asyruǧa kedergı keltırıp, ziian tigızudı oilap jür. Bız būǧan, älbette, eşqaşan jol bermeimız", - dedı Memleket basşysy.
Toqaevtyŋ sözınşe, äleumettık infraqūrylym nysandary, sonyŋ ışınde joldar, äuejailar, emhanalar, oŋaltu ortalyqtary, şyǧarmaşylyq üilerı, mektepter men sport keşenderı sapaly salynuy kerek. Būl – mültıksız oryndaluǧa tiıs talap.
"Memleket qarjysynyŋ tiımdı jūmsaluyn arnaiy memlekettık komissiia qadaǧalaidy. Onyŋ qūramy kelesı aptanyŋ basynda jariialanady. Osylaişa, bız halyqtyŋ äl-auqatyn arttyrudy jäne azamattardyŋ tūrmys sapasyn jaqsartudy közdeitın tüpkı maqsatymyzdy jüzege asyrudy bastaimyz.
Osy ıste Konstitusiiamyzda bekıtılgen Zaŋ, Ädılettılık jäne Tärtıp qaǧidattary ainymas temırqazyǧymyz bolady. Ärine, būl jol oŋai bolmaidy. Tıptı türlı qiyndyqtar da kezdesetını anyq. Halqymyz "Jol mūraty – jetu" dep beker aitpaǧan. Sondyqtan tabandylyq tanytyp, alǧa qoiǧan maqsattarymyzǧa mındettı türde qol jetkızemız", - dedı Prezident.
