Şyǧys Qazaqstan oblysynyŋ qar basqan taularynda qalyp qoiǧan 5 qazaqstandyqtyŋ oqiǧasy amerikalyq milliarder İlon Masktyŋ nazaryn audardy, dep habarlaidy «Adyrna» tılşısı.
Bailanyssyz qalǧan er adamdar Starlink sputniktık internetı arqyly qūtqaruşylarǧa habar bere alǧan.
«Starlink adam ömırın qūtqarady», – dep jazdy milliarder.
Aita keteiık, būl oqiǧa qazan soŋynda bolǧan edı. Kürşım audanynda bes aŋşy mıngen jol talǧamaityn kölık būzylyp qalǧan. Olar Qystau Kürşım auylynan şamamen 15 şaqyrym jerde, tauly aimaqta bolǧan. Olarǧa Starlink sputniktık bailanysy kömektesken. Er adamdar özderınıŋ qai jerde ekenın qūtqaruşylarǧa habarlap, kömek kelgenşe olarmen bailanysta bolǧan.
Aŋşylarǧa jetu üşın Tötenşe jaǧdailar ministrlıgınıŋ qyzmetkerlerı «Trekol» qarda jüretın kölıgımen şamamen 100 şaqyrym jol jürgen. Qūtqaruşylar er adamdardy tauyp, olardyŋ jol talǧamaityn kölıgın auylǧa deiın alyp baruǧa kömektesken. Eşkım medisinalyq kömekke mūqtaj bolmaǧan.
Eske salaiyq, Qazaqstandaǧy Beeline kompaniiasy elde Starlink Mobile tehnologiiasyn alǧaş bolyp tanystyrǧan edı. Būl tehnologiia smartfon arqyly sputniktık bailanysqa tıkelei qosyluǧa mümkındık beredı. Onyŋ basty artyqşylyǧy – qosymşa jabdyq satyp aludyŋ, sputniktık antenna ornatudyŋ nemese arnaiy terminaldardy paidalanudyŋ qajetı joq. Qosylu üşın mobildı qūrylǧy men tiıstı bailanys profilın baptau jetkılıktı.
