Qazaqstan IIM «Qorǧas» halyqaralyq şekara maŋy yntymaqtastyǧy ortalyǧynda qauıpsızdık rejimı men qoǧamdyq tärtıptı qamtamasyz etu jönındegı kelısımdı ratifikasiialau turaly zaŋ jobasyn äzırledı, dep habarlaidy “Adyrna”.
Qūjat «Aşyq NQA» portalynda qoǧamdyq talqylauǧa ūsynylǧan.
Kelısımnıŋ negızgı maqsaty – ekı eldıŋ qūzyrettı organdary arasyndaǧy özara ıs-qimyldyŋ tiımdı qūqyqtyq tetıgın qalyptastyru.
Qūjatqa säikes, ortalyq aumaǧynda qūqyq būzuşylyq jasady degen küdıkke ılıngen nemese aiyptalǧan Qazaqstan, Qytai jäne üşınşı memleketterdıŋ azamattaryn, azamattyǧy joq adamdardy qudalau är eldıŋ aumaqtyq iurisdiksiiasyna säikes jüzege asyrylady.
Eger küdıktı nemese aiyptaluşy ortalyqtyŋ ekınşı elge tiesılı bölıgıne ötıp ketse, sol eldıŋ qūzyrettı organdary būl turaly qudalaudy jüzege asyryp jatqan tarapqa habarlauǧa, tergeu jürgızuge jäne adamdy ūstauǧa jan-jaqty kömek körsetuge mındettı bolady.
Kelısımde jappai tärtıpsızdıkter, terroristık aktıler jäne adamdardyŋ ömırı men densaulyǧyna qauıp töndıretın özge de jaǧdailar kezındegı bırlesken ıs-qimyl tärtıbı de közdelgen. Mūndai jaǧdaida ekı eldıŋ qūzyrettı organdary qauıptıŋ aldyn alu jäne ony zalalsyzdandyru üşın zaŋ aiasynda qajettı şaralardy qabyldaidy.
Sonymen qatar qūjatta arnaiy talap belgılengen. Tiıstı taraptyŋ sūrauy nemese rūqsaty bolmasa, ekınşı taraptyŋ qūzyrettı organdarynyŋ qyzmetkerlerı men äskeri qyzmetşılerıne ortalyqtyŋ ekı elge tiesılı bölıkterı arasyndaǧy şekarany kesıp ötuge jol berılmeidı. Būl talap fors-majorlyq jaǧdailarǧa teŋestırıletın tötenşe oqiǧalar kezınde de qoldanylady.
Zaŋ jobasy 18 qaraşaǧa deiın qoǧamdyq talqylauǧa ūsynylǧan.
