İrak astanasynda ötken İslam yntymaqtastyǧy ūiymy Syrtqy ıster ministrlerı keŋesınıŋ (İYŪ SIMK) 52-şı sessiiasy barysynda Qazaqstan ökılı, elşı Baǧdat Ämıreev İYŪ Bas hatşysynyŋ äkımşılık jäne qarjy mäselelerı jönındegı orynbasary lauazymyna bırauyzdan sailandy. Būl turaly 18 qazanda SIM jazdy, dep habarlaidy «Adyrna» tılşısı.
Otyrys aiasynda elşı ant qabyldap, resmi türde qyzmetıne kırıstı.
Qazaqstan ökılınıŋ BŪŪ-dan keiın müşe memleketterınıŋ sany boiynşa ekınşı orynda tūrǧan ükımetaralyq ūiym – İYŪ Bas hatşylyǧyndaǧy basşylyq lauazymdardyŋ bırıne sailanuy ūiymǧa müşe memleketterdıŋ Qazaqstanǧa degen joǧary senımın jäne elımızdıŋ köpjaqty yntymaqtastyqty nyǧaituǧa qosqan ülesın moiyndaitynyn körsetedı. Būl şeşım Qazaqstan men İYŪ arasyndaǧy özara ıs-qimyldy odan ärı damytuǧa jäne Ūiymǧa müşe memleketterdıŋ müddesıne sai bırlesken bastamalardy ılgerıletuge yqpal etetın bolady.
