Foto: Report
Amerika Qūrama Ştattary Ortalyq Aziia elderımen qarym-qatynasty damytuǧa ülken män beredı jäne öŋır memleketterımen yntymaqtastyqty nyǧaitudy közdeidı. Report agenttıgınıŋ habarlauynşa, būl turaly AQŞ Memlekettık hatşysy ärı prezidenttıŋ ūlttyq qauıpsızdık jönındegı keŋesşısı Marko Rubio Özbekstanǧa attanar aldynda jurnalistermen äŋgımelesu barysynda aitty, dep habarlaidy “Adyrna”.
«Äŋgıme tek Özbekstan turaly ǧana emes, Ortalyq Aziianyŋ basqa tört elı turaly da bolyp otyr. Būl – maŋyzdy qarym-qatynastar», - dep atap öttı Rubio.
Onyŋ aituynşa, yntymaqtastyqty nyǧaitu üşın öŋır memleketterımen tıkelei bailanystardy saqtap otyru qajet. Memlekettık hatşy aldaǧy saparyn strategiialyq maŋyzy bar sapar dep sipattady.
Özbekstanda Rubio C5+1 formatyndaǧy syrtqy ıster ministrlerınıŋ kezdesuıne qatysady. Sondai-aq Ortalyq Aziia elderınıŋ ökılderımen ekıjaqty kelıssözder jürgızedı.
2015 jyldan berı jūmys ıstep kele jatqan C5+1 formaty AQŞ pen Ortalyq Aziianyŋ bes memleketın – Qazaqstan, Qyrǧyzstan, Täjıkstan, Türıkmenstan jäne Özbekstandy bırıktıredı.
AQŞ Memlekettık departamentınıŋ mälımetınşe, Özbekstanǧa amerikalyq ırı biznes ökılderınıŋ 200-den astamy da barady.
Vaşington olardyŋ qatysuy AQŞ pen Ortalyq Aziia elderı arasyndaǧy sauda bailanystaryn damytudyŋ jaŋa kezeŋıne jol aşady dep ümıttenedı.
