Foto: arctic-freedom
Şyǧys Qazaqstan oblysyndaǧy Ridder qalasynyŋ tūrǧyndary soŋǧy künderı jabaiy aiulardy bırneşe ret baiqaǧan. Jyrtqyştar tūrǧyn üilerdıŋ, dükenderdıŋ maŋynda jäne №12 jaŋa mektepke aparatyn jolda jürgen. Būl jaǧdai qala tūrǧyndarynyŋ, äsırese balalardyŋ qauıpsızdıgıne qatysty alaŋdauşylyq tuǧyzdy, dep habarlaidy "Adyrna".
Kuägerlerdıŋ aituynşa, ötken tünı Lazo köşesındegı №13 üidıŋ aulasynda qonjyǧy bar aiu jürgen. Oqiǧa ornynda tüsırılgen videoda aiulardyŋ jeke üidıŋ aumaǧyna kırgenı körınedı. Üi iesınıŋ itı olarǧa ürıp, qarsy şyqqan kezde, jabaiy aŋdar qaşa jönelgen. Olar temır qorşaudan asyp ötıp, keiın «Krestianskii dom» dükenınıŋ maŋynda baiqalǧan.
Tūrǧyndar bolǧan jaǧdaiǧa bailanysty polisiia şaqyrǧan.
Taŋerteŋ äleumettık jelıler men qalalyq chattarda aiulardyŋ basqa köşelerde de körıngenı turaly habarlamalar tarady. Bır tūrǧyn tüngı saǧat törtter şamasynda Semei köşesınen ekı aiudy kezdestırgenın jazǧan. Atalǧan köşede «Krestianskii dom» dükenı de ornalasqan.
Sonymen qatar, tüngı saǧat bırlerde Bazarnaia köşesınde de aiular videoǧa tüsırılgen. Kuägerlerdıŋ mälımetınşe, jabaiy aŋdar №12 jaŋa mektepke qarai bara jatqan jolda jürgen. Kadrlardan būǧan deiın baiqalǧan qonjyǧy bar aiudy köruge bolady. Keiın ekı qonjyǧymen jürgen aiu beinelengen özge videolar da jariialandy.
Bır kün būryn qala tūrǧyndary Talovka audanynda da aiulardy körgenderın habarlaǧan. Olar jabaiy aŋdardyŋ ızderın jäne bülıngen qorşaulardy suretke tüsırıp, äleumettık jelılerde bölısken.
Oqiǧaǧa bailanysty ŞQO Tabiǧi resurstar jäne tabiǧat paidalanudy retteu basqarmasyna qarasty orman jäne aŋşylyq şaruaşylyǧynyŋ jedel den qoiu jasaǧy Ridderge barǧan. Qazır inspektorlar aiulardyŋ qozǧalysyn baqylap, olardy ürkıtu jäne eldı meken aumaǧynan şyǧaru jūmystaryn jürgızıp jatyr.
Jedel den qoiu jasaǧynyŋ basşysy Ermek Baǧlanūlynyŋ sözınşe, künnıŋ suytuy men qardyŋ tüsuı aiulardyŋ qysqy ūiqyǧa daiyndalu kezeŋın jaqyndatady.
«Ridderde aua raiy būzylyp jatyr, jaqynda qar jauady. Alǧaşqy qar tüskennen keiın aiular apandaryna jaqyndaidy, olardy daiyndai bastaidy. Ekı aptadai kütu kerek, sodan keiın aŋdar tauǧa ketedı. Bır jarym aidan keiın qysqy ūiqyǧa jatady», – dedı ol.
Qala tūrǧyndary, äsırese ekınşı auysymda oqityn balalardyŋ qauıpsızdıgıne alaŋdauly. Ata-analar oquşylardyŋ keşkı uaqytta mektepten üiıne qaitu kezınde jabaiy aŋdarǧa kezıgıp qaluynan qauıptenedı. Olar aiulardyŋ qala aumaǧynda qaita-qaita paida boluyna bailanysty tiıstı şaralardy küşeitudı talap etıp otyr.
Aita keteiık, şılde aiynyŋ soŋynda Ridder maŋyndaǧy Batys Altai memlekettık tabiǧi qoryǧynyŋ aumaǧynda aiu omartada jūmys ıstep jürgen 58 jastaǧy er adamǧa şabuyl jasaǧan bolatyn.
Er adam auyr jaraqat alyp, bırneşe kün boiy jansaqtau bölımınde emdeldı. Ol 19 tamyzda auruhanadan şyǧarylǧan. Oqiǧadan keiın şabuyl jasaǧan aiudy inspektorlar atyp öltırgen.
