Japoniianyŋ Aiti prefekturasy men Nagoia qalasynda ötıp jatqan 2026 jylǧy Aziia oiyndarynda jetınşı jarys künı aiaqtaldy. 26 qyrküiektegı jarystardyŋ qorytyndysy boiynşa Qazaqstan sportşylary bes qola medal jeŋıp aldy, dep habarlaidy "Adyrna".
Osylaişa, jetı jarys künınen keiın Qazaqstan qūramasynyŋ qorjynynda 35 jülde bar. Onyŋ 8-ı altyn, 8-ı kümıs jäne 19-y qola medal. Qazaqstan jalpykomandalyq esepte besınşı orynda keledı.
Künnıŋ negızgı jüldelerınıŋ üşeuı eskek esu jäne kanoede esu baǧdarlamasynan tüstı.
500 metrge baidarkamen jarysudan äielder arasyndaǧy finalda Stella Suhanova märege üşınşı bolyp jettı. Ol qaşyqtyqty 1 minut 59,688 sekundta aiaqtady. Būl – sportşynyŋ osy Aziia oiyndaryndaǧy ekınşı qola medalı. Būǧan deiın Suhanova baidarkadaǧy törttık qūramynda da üşınşı oryn alǧan edı.
Osy qaşyqtyqtaǧy erler arasyndaǧy bäsekede Dmitrii Holmogorov qola jüldege ie boldy. Qazaqstandyq sportşynyŋ nätijesı – 1 minut 44,453 sekund. Altyndy Özbekstan ökılı Şahrier Mahkamov, kümıstı Oŋtüstık Koreia sportşysy Djan San Von aldy.
Aralas kanoe ekipajdarynyŋ 500 metrlık jarysynda Sergei Emelianov pen Rufina İskakova Qazaqstan qorjynyna taǧy bır qola medal qosty. Olar finaldy 1:51.124 nätijesımen üşınşı bolyp aiaqtady. Būl saiysta Qytai altyn, al Özbekstan kümıs medal jeŋıp aldy.
Oq atudan Qazaqstan äielder qūramasy da jüldege qol jetkızdı. 50 metr qaşyqtyqtan vintovkamen üş pozisiiada atu boiynşa komandalyq jarysta Arina Malinovskaia, Sofiia Şuljenko jäne Elizaveta Bezrukova 1754 ūpai jinap, üşınşı oryn aldy. Altyn Qytai qūramasyna, kümıs Ündıstan komandasyna būiyrdy. Sonymen qatar Arina Malinovskaia jeke saiysta finalǧa ötıp, altynşy orynǧa tūraqtady.
Qazaqstannyŋ besınşı qola jüldesın semserlesuşıler ielendı. Erler komandalyq saiysynda Nazarbai Sattarhan, Artem Sarkisian, Quanyş Ergaşbai jäne Nūrmūhammed Jailybai şirek finalda Qytai qūramasyn 45:40 esebımen jeŋdı. Jartylai finalda olar Japoniiaǧa 34:45 esebımen ese jıberıp, jarysty qola medalmen aiaqtady. Artem Sarkisian üşın būl – Aziia oiyndaryndaǧy ekınşı jülde. Ol būǧan deiın jeke saiysta da qola medal alǧan bolatyn.
Qazaqstandyq Olga Şmeleva men Artem Tereşenko jüldege säl ǧana jetpei qaldy. Aralas baidarka-ekılık qūramalary arasyndaǧy 500 metrlık finalda olar 1:41.272 nätije körsetıp, törtınşı orynǧa ie boldy.
Boksşylar arasynda Mahmūd Sabyrhan men Nūrbek Oralbai kelesı kezeŋge öttı. 55 kelıge deiıngı salmaqta synǧa tüsken Sabyrhan 1/8 finalda İran ökılı Mehdi Kazemiden basym tüstı. Jekpe-jek kezınde qazaqstandyq boksşy qarsylasyn ekı ret nokdaunǧa tüsırdı.
Al 90 kelıge deiıngı salmaqta Nūrbek Oralbai Auǧanstan sportşysy Silab Nurimen kezdestı. Töreşılerdıŋ bırauyzdy şeşımımen 5:0 esebınde jeŋıske jetken Oralbai da şirek finalǧa joldama aldy.
Qazaqstandyq boksşy Viktoriia Grafeeva üşın jarys aiaqtaldy. 60 kelıge deiıngı salmaqtaǧy 1/8 finalda ol Qytailyq Taibei ökılı, Olimpiada chempiony Lin Iýitinge 2:3 esebımen jol berdı. Jeŋımpaz töreşılerdıŋ bölıngen şeşımımen anyqtaldy.
Jeŋıl atletikadan Qazaqstan namysyn qorǧaǧan Şadrak Koech erler marafonynda jetınşı oryn aldy. Ol 42,195 şaqyrymdy 2 saǧat 14 minut 07 sekundta jügırıp öttı jäne jarysty üzdık ondyqtyŋ qatarynda aiaqtady.
Auyr atletikadan 75 kelıge deiıngı salmaqta öner körsetken Beksūltan Aitbai jetınşı orynǧa tūraqtady. Qazaqstandyq sportşy jūlqa köterude 135 kelı, serpe köterude 177 kelı köterıp, qos saiys qorytyndysynda 312 kelı nätijege qol jetkızdı.
