Kaspii teŋızındegı äskeri oqu-jattyǧu kezınde äskeri qyzmetşılerdıŋ qaza boluyna qatysty ıs boiynşa Qorǧanys ministrlıgı jüiesınıŋ bes lauazymdy tūlǧasy ūstaldy, dep habarlaidy "Adyrna".
Polisiia mälımetınşe, olardyŋ qatarynda Äskeri-teŋız küşterı Bas qolbasşysynyŋ bırınşı orynbasary – ştab bastyǧy, ekı äskeri bölımnıŋ komandirı, teŋız jaiau äskerlerı rotasynyŋ jäne «Qaisar» katerınıŋ komandirlerı bar.
Küdıktıler Aqtau qalasy Polisiia basqarmasynyŋ uaqytşa ūstau izoliatoryna qamaldy. Olarǧa qyzmetke salǧyrt qarau jäne korabl jürgızu qaǧidalaryn būzu boiynşa auyr zardaptarǧa äkep soqqan qylmystyq qūqyq būzuşylyq jasady degen küdık keltırılıp otyr.
"Tergeu barysynda oqu-jattyǧudy ūiymdastyru, qauıpsızdık talaptarynyŋ saqtaluy, meteorologiialyq jaǧdaidyŋ eskerıluı, katerdıŋ tehnikalyq jai-küiı jäne jauapty tūlǧalardyŋ äreketterı tekserılude.
Is boiynşa sotqa deiıngı tergep-tekseru IIM äskeri-tergeu bölımşesımen jürgızılıp, Bas prokuratura men Işkı ıster ministrlıgınıŋ erekşe baqylauynda", delıngen habarlamada.
Eske salaiyq, 24 qyrküiekte Maŋǧystau oblysynda Qazaqstan Qaruly küşterı Äskeri-teŋız küşterınıŋ oqu-jattyǧuy kezınde 17 äskeri qyzmetşını teŋız aǧyzyp äketken. Olar Kaspii jaǧalauynda oqu-jauyngerlık tapsyrma oryndap jatqanda aua raiy kürt naşarlap, jel küşeigen.
Qorǧanys ministrlıgınıŋ mälımetınşe, 14 äskeri qyzmetşı qaza tapqan, üşeuı qūtqaryldy.
Qaiǧyly oqiǧadan keiın 25 qyrküiek Qazaqstanda jalpyūlttyq aza tūtu künı bolyp jariialanǧan bolatyn.
